Mag-uuma nga wanted sikop

CEBU, Philippines – Gisikop sa kapolisan ang usa ka mag-uuma pasado alas 11 sa buntag sa niaging adlaw sa Sitio Dolinson, Barangay Poblacion, Lungsod sa Borbon pinasikad sa warrant of arrest.

Ang dinakpan giila nga si Francisco Puerto Presbitero, 30, kinsa adunay kasong frustrated murder niadtong tuig 2016 sa giingong pagpanunggab niini sa iyang ig-agaw.

Matud ni Insp. Eddie Dalaguit sa Borbon Police Station nga nasikop si Presbitero pinaagi sa tabang sa wala hinganling barangay tanod sa maong lugar kinsa maoy nagtudlo sa kapolisan sa nahimutangan sa suspek.

Unang gituohan sa kapolisan nga nagpalayo si Presbitero gawas sa Sugbo.

Ang warrant of arrest giisyu ni Judge Antonio Marigomen sa Regional Trial Court Branch 61 sa Dakbayan sa Bogo niadtong Abril 15, 2016.

Ang suspek pabayron og P200 mil nga piyansa alang sa temporaryong kagawasan niini.

Ang suspek kasamtangang gitanggong sa Borbon Police Station. (CNU Intern ug Romeo T. Limpangog/GMR)(BANAT NEWS)