Margot adik?

CEBU, Philippines – Si Konsehal Margot Osmeña nga asawa ni Cebu City Mayor Tomas Osmeña gipasanginlan nga tiggamitan og gidiling matang sa drugas ni kanhi mayor Michael Rama.

Sa interview sa mga reporters, si Rama miingon nga dugay na kini nga isyu kaniadto, apan wala lang kaayo mahatagi og pagtagad sa media.

“Dili man ko kalimot niana nga hinganlan na siya og adik sa asawa ni Alvin Garcia. Dili man ko moapil niining duwa nga pagpangguba, pero kon gusto nila og gubat, aw gubat,” matud ni Rama.

Nasuko si Rama kay kanunay’ng tawgon ni Mayor Osmeña og Team Suyop ang Team Rama nga nagpasabot nga ang mga sakop niini mogamit og gidiling matang sa drugas.

Matud ni Rama nga giguba ni Mayor Osmeña ang mga kapitan sa barangay nga alyado sa Team Rama pinaagi sa paghingalan kanila og mga kawatan tungod lang kay wala dayon makahatag og kwentada sa gihatag kanila nga minilyon ka pesos nga cash assistance gikan sa City Hall.

Nahibaw-an nga ang asawa ni kanhi mayor Garcia nga maoy gikutlo ni Rama nga gikuhaan niya sa kasayuran, tua sa Estados Unidos ug           wala kakuhai og pamahayag.

Si Konsehal Osmeña nga gikuhaan og reaksiyon igo lang mikatawa ug nagduda nga “stressed” na gyud kaayo si Rama kay bisan unsa na lang ang isulti. Tun-an pa ni Konsehal Osmeña kon angay ba nga mopasaka siya og kasong libel batok kang Rama.

“He must be terribly stressed. God bless him na lang,” matud ni Konsehal Osmeña.

Si Mayor Osmeña sab miingon nga ang pamasangil ni Rama dili angay’ng tagdon.

“My wife is already 69 years old, drug addict? That doesn’t need any explanation, she serve already for 25 years, she doesn’t make people ligid-ligid there, she doesn’t walk into telephone pole, siya pa ang nahimong drug addict, na-praning na si Rama”, sigun ni Mayor Osmeña.- (/RUB)(BANAT NEWS)