Gangs sa Minglanilla patutokan

CEBU, Philippines – Gimandoan sa direktor sa Cebu Provincial Police Office nga si Senior Supt. Manuel Javier Abrugena ang Minglanilla Police Station nga pangusgan ang ilang pagpatrolya palibot sa mga tunghaan sa maong lungsod tungod niining mga kagubot mugna sa mga gangs.

Kini human gipusil sa tulo ka mga batan-ong nag-edad pa lang og 16 ug 17 anyos nga membro og gang ang usa ka 16 anyos nga batang lalaki kinsa giingong membro usab sa karibal nila nga gang niadtong Domingo sa gabii didto sa barangay Poblacion Ward III sa maong lungsod.

Si Abrugena miingon nga nakahinabi na sa hepe sa kapolisan sa Minglanilla nga si Senior Insp. Verniño Noserale ang mga aktibong fraternities sa lungsod ug silang tanan nanghunaw niini. “Kino-condemn din ng Akrho (Alpha Kappa Rho) and Tau Gamma Phi ang patuloy na violent incidents na nangyari dyan,” sigun pa sa direktor.

Sa pag-abli sa klase karong Hunyo gusto ni Abrugena nga pangusgan sa Minglanilla ang pagpatrolya ilabi na sa mga tunghaan. Gimandoan usab ang tanang hepe nga makig-estorya kanunay sa mga principal sa mga tunghaan diha sa ilang mga lungsod aron malikay ang kabataan sa mga dautang mga grupo sama sa mga gangs. “I have given directive to all COP to work closely sa officials ng schools para po mapag-ingatan natin ‘yung mga students once na mag-start na ‘yung classes and to closely monitor ang activities ng mga estudyante,” matud pa ni Abrugena.  Si Abrugena nibisita ug nitabang sa gipahigayong Brigada Eskwela sa Tabunok Central School kagahapon alas 9 sa buntag sa dakbayan sa Talisay. Mitabang ang hepe sa pagpanday sa mga guba nga mga lingkuranan ug uban pa ug plano niyang mobisita usab sa uban pang mga tunghaan. (Rafols E. Gervacio)(BANAT NEWS)