Nagdala og armas didto sa Danao sikop

CEBU, Philippines – Nasakmitan og armas nga walay lisensiya ang usa ka tawo nga nakapaalarma sa mga lumolupyo didto sa Barangay Cambanay, Dakbayan sa Danao kaniadtong Biyernes sa      hapon.

Si PO2 Gypsy Miro sa Danao City Police Station miila sa dinakpan nga mao si Rolly Silvano, 31, taga Sitio Cogon, Barangay Guinsay, Danao. Nadakpan siya tungod kay nanawag og mga polis ang mga lumolupyo nga nagduda sa iyang linihokan.

Pag-abot sa grupo sa mga polis nga gipangulohan ni PO3 Phil Restauro dali nila nga gisita si Silvano ug nakuhaan og 357 Magnum revolver ug mga bala.

Wala makapakita og papeles si Silvano mao nga siya gidakop sa mga polis ug gitanggong karon sa bilanggoan. Ugmang adlawa, gikatakda nga ang dinakpan pasakaan og kaso nga paglapas sa Republic Act 10591, kay nagdala og armas nga walay pagtugot.

Kadtong gustong mohupot og armas kinahanglang molukat una og License to Own and Possess Firearms (LTOPF), unya iparehistro ang iyang armas, ug kun dad-on ang armas gawas sa iyang balay, kinahanglang mokuha og special permit nga magtugot sa pagdala niini. (/RUB)(BANAT NEWS) (BANAT NEWS)