Mga kontrabando nasakmit gikan sa MCJ

CEBU, Philippines — Nasakmit sa laing joint greyhound operation sa kapolisan, Philippine Drug Enforcement Agency (PDEA) 7 ug mga sakop sa Bureau of Jail Management and Penology sa Mandaue City Jail  (BJMP)  kagahapon sa buntag ang nagkadaiyang mga kontrabando nga naglakip sa pinakete nga shabu, mga electronic gadgets, kuwarta nga gituohang halin sa ilegal nga drugas ug uban pa.

Si Senior Inspector Reyco Romaguera nga maoy deputy chief sa Presinto 5 sa Mandaue City Police Office (MCPO) miingon nga dunay medium size nga shabu nga nakuha sa LED bulb, drug paraphernalia ug uban pang kontrabando sa karsel sa high profile drug personality nga si Steve Go.

Apil sa mga nasakmit ang electronic weighing scale, mobile phone, phone chargers, earphones ug ang cash nga P64,004 nga gituohang halin sa ginadiling drugas. Way nakuhang kontrabando sa karsel sa 174 ka mga babayeng preso.

Kahinumdoman sa miaging tuig, nakuhaan gihapon og susamang mga kontrabando ang selda ni Go.  Sa laing bahin, mibahad dayon ang bag-ong jailwarden sa Cebu Provincial Detention and Rehabilitation Center (CPDRC) nga si Reynaldo Valmoria nga dili siya magduha-duha pagpataktak  sa mga jail personnel nga magbinuang.

Matud ni Valmoria nakaila na sila sa giingong “insider”nga tigpasulod og kontrabando sa prisohan.

Si Valmoria  nakigtagbo sa mga personnel sa CPDRC kagahapon ug mipahibalo  sa iyang mga buot usbon sa sistema ug sa mga gwardiya.

Si Valmoria adunay kasinatian sa jail management   sa nasod sa Kosovo  Southeastern Europe sa dihang gidestino siya didto  sa United Nations. Rowena Capistrano ug Le Phyllis F. Antojado/IBM (BANAT NEWS)