Namalhin sa BOPK
CEBU, Philippines – Duha na usab ka mga kapitan gikan sa oposisyon ang mitapon sa partido ni Cebu City Mayor Tomas Osmeña.
Si Barangay Tinago kapitan Domingo Villamor Lopez ug Banilad Barangay kapitan Dennis Tabar pormal nga mihural kang Osmeña kagahapon.
Si Lopez miingon nga makasabot ra ang iyang kanhi partido sa iyang pagbalhin ug kini para serbisyo sa ilang mga konstituwente ilabi na sa mga senior citizens ug sa kabataan sa ilang barangay.
Samtang kagahapong adlawa unta manumpa ang kapitan sa Mabolo apan nakalakaw na ang mayor ayha pa sila naabot.
Sa pikas bahin, ang Sangguniang Kabataan chairman sa barangay Talamban nga si Christine Claire Bontuyan nanumpa kang Osmeña ug sakop na sa BOPK.
Si Bontuyan, 22 anyos, nigradwar sa kolehiyo niadtong tuig 2016 sa kursong Bachelor of Science in Accounting Technology ug karon third year law student.
Sa milabay nga piniliay, si Bontuyan uban ang iyang mga Konsehal midagan pagka-independente ug dili sila sakop ni bisan unsa nga grupo.
“I think that for a government to function properly, power must be properly decentralized in order for us to work cohesively.
In the government we must take cognition and we must adhere to the existence of an administration and that administration is led by Mayor Tommy Osmeña,” tipik sa pamahayag ni Bontuyan.
Si Bontuyan interesadong modagan sa pagka-presidente sa SK Federation sa siyudad karong Mayo 28. Giingong tulo ka kandidato sa SK Federation ang modagan gikan sa partido sa mayor. (Katrina Aguirre /IBM)(BANAT NEWS)
- Latest
