Nagdumot sa anak, papa ang gipatay
CEBU, Philippines — Patay ang usa ka 63-anyos nga lalaki human gipusil sa duha ka lalaki nga nagsakay og motorsiklo sa Villalon Drive, Capitol Site, Cebu City alas 9 sa gabii niadtong Mayo 19.
Giingong naglakaw ra ang biktima nga si Paulino Suarez sa dalan sa maong lugar dihang niabot ang duha ka lalaki nga nagmotorsiklo ug gipusil samtang dali nga niikyas ang mga mamumuno.
Gidala dayon si Suarez sa tambalanan apan gideklarar na kining dead on arrival gumikan sa tulo ka samad sa dughan.
Usa pa sa duha ka mamumuno ang nailhan sa kapolisan tungod sa full-face helmet nga gisuot sa kuyog niini.
Ang usa ka suspek giila nga si Domar Codilla alyas Mamaw kinsa giingong adunay dumot sa anak nga lalaki sa biktima, matud ni SPO2 Michael Angelo Singson.
Sumala ni Singson nga sa wala pa naabot ang gabii, si Codilla nagsige na og pangita sa anak sa biktima ug gani nanion kini og armas.
“Unya mao to nga wa gyud niya makit-i ang iyang subject, mao to ang nakit-an niya ang papa na lang. Naa gyud to siya’y grudge sa anak,” asoy ni Singson.
Tulo ka basiyo sa bala sa kalibre .45 ang na-recover sa crime scene. - Jessa V. Caumeran, CNU Intern (BANAT NEWS)
- Latest
