Tulo ka mayor wa imbitaha
CEBU, Philippines — Tulo ka mga mayor sa Sugbo ang wala pasudla sa panagtigom tali sa mga mayor kauban si Presidente Rodrigo Duterte niadtong Biyernes sa gabii diha sa Waterfront Cebu City Hotel and Casino.
Ang mga wala pasudla mao sila si Cebu City Mayor Tomas Osmeña, Ronda Mayor Mariano Blanco ug Daanbantayan Mayor Vicente Loot.
Si Osmeña gitumbok ni Justice Secretary Vitaliano Aguirre nga drug protector ug gipasanginlan sa mayor si Presidential Assistant for the Visayas Michael Dino nga may kalambigitan niini, ang duha dili maayo og relasyon.
Samtang si Loot usa usab sa mga gipangalanan ni Duterte nga drug protector sa diha naa pa kini sa serbisyo sa Philippine National Police.
Sa pikas bahin, si Blanco usa usab sa giila sa National Police Commission nga nalambigit sa illegal drug trade human sa matud pa paghimo og validation sa intelligence agencies.
Si Osmeña nakit-an sa hotel lobby. Usa ka tinubdan ang miingon nga way imbitasyon nga gipadala ngadto kaniya alang sa maong tigom sa mga mayor, vice mayors ug mga kongresista uban ni Duterte.
Diha sa maong tigom si kanhi presidente ug karon Pampanga Representative Gloria Macapagal-Arroyo, House Speaker Pantaleon Alvarez, PCOO Secretary Jose Ruperto Martin Andanar ug uban pang sakop sa gabinete ug si Dino.
Si Loot mikompirmar nga wa siya’y nadawat nga imbitasyon sa maong tigom.
Apan si Duterte nagtuo nga nitambong si Loot ug nagpangutana kon asa kini dungan sa pag-apelar sa pangulo ngadto sa mga mayor nga dili gyud moapil-apil sa ilegal nga drugas.
“But remember, General Loot, your house was flooded with drugs sa isang kwarto. Huwag na tayong maglokohan dito,” matud pang Duterte.
Apan si Loot dihang gikuhaan sa iyang habig miingon nga iyang giimbitar ang kapolisan, Philippine Drug Enforcement Agency, ug National Bureau of Investigation nga bisitahon ug siksikon ang iyang balay.
“Open book man ta,” matud pang Loot. Sumala pa ni Loot siya pirme ang nabutang sa alaot kay wa gyud paminawa ang iyang habig.
“Maayo unta if the government agencies monitoring me will collate all their intel data because they knew what I have been doing all along and they would know that I’m innocent in all allegations,” dugang pa ni Loot. (BANAT NEWS)
- Latest