Kapin P4 Milyones nga shabu nasakmit

CEBU, Philippines — Mokabat sa kapin P4 milyones nga gidudahang shabu ang nasakmit sa managlahing anti-illegal drug operations nga gihimo sa kapolisan ug ingon man sa mga sakop sa Philippine Drug Enforcement Agency-7 sugod niadtong Sabado ug kagahapon.

Usa ka milyon ka pesos nga balor sa gituohang shabu ang nasakmit sa kapulisan sa Danao sa ilang sagunson nga buy-bust operation sa barangay Looc, Poblacion, Guinsay ug Suba niadtong Sabado sa gabii hangtod Domingo sa kaadlawon hinungdan sa pagkasikop sa 17 ka mga tawo.

Si Police Officer 3 Phil Restauro, sa Drug Enforcement Unit (DEU) sa Danao City mitug-an nga ang ilang mga dinakpan mga bag-ong sulbong nga tigpayuhot og ginadiling drugas.

Ang mga dinakpan giila sa kapulisan nga sila si Christian Mae Formentera, Aiza Dumasig, Julierez Montalban, Val Lofranco, Aljer Montalvo, Vanisa Bohol, Nowelyn Maturan, Leezan Mae Lom-oc, Rosjean Legaspi, Jonalyn Asister, ug Marlon Padilla.

Si Formentera maoy nakuhaan og sobra sa tunga sa milyon nga balor sa drugas ug mitug-an sa kapulisan nga naggikan sa Cebu City ang iyang supply sa illegal drugs. Ang ubang mga dinakpan nakuhaan usab og P332, 170 mil nga kantidad sa shabu.

Samtang nadakpan usab ang mga gidudahang tiggamitan niini nga sila si Ronel Denoy, Wilmar Maningo, Jack Rosal, Jomar Miaga, Judito Presillas, ug Edwin Tejada.

Sa laing bahin, ang Philippine Drug Enforcement Agency (PDEA) - 7 nakasakmit usab og hapit P700 mil nga balor sa drugas gikan sa tulo ka gituohang drug pusher didto sa Barangay Labangon, Cebu City niadtong Sabado sa hapon.

Ang mga suspetsado giila sa tigpamaba sa PDEA -7 nga si Leia Albiar nga sila si Resel Basilla, 43; Roland Ramas, 39; ug Jayson Royo, 27, lumolupyo sa maong lugar. Sa pag-abot ni Presidente Rodrigo Duterte sa Sugbo niadtong Sabado gironda sa mga sakop sa Regional Intelligence Division (RID) 7, Police Regional Drug Enforcement Unit 7, Cebu City Intelligence Branch ug Police Station 10 sa Cebu City Police Office (CCPO) gipangunahan ni PSupt. Glenn Mayam, hepe sa Philippine National Police (PNP) Drug Enforcement Group ang usa ka Aljun Chavez.

Si Chavez gikatahong sakop sa usa ka dakong sindikato sa drugas  nga nakuhaan og 300 gramos nga gidudahang shabu nga nagkantidad og P3,540,000 sa operasyon diha sa Katipunan Street, Barangay Tisa ning siyudad sa Sugbo.

Si Mayam mibutyag nga si Chavez naapil sa watch list sa PNP-DEG.

Sa dakbayan sa Talisay, unom ka durugista ang nasikop sa managlahing barangay sa miaging adlaw.

Unang operasyon sa operatiba sa Talisay City Police didto sa sitio Mahayag, Barangay San Isidro nga niresulta sa pagkasikop kang Mario Cabo, 61, nga nakuhaan og upat ka medium ug lima ka gagmay nga pakete sa shabu.

Kuyog niini iyang mga anak nga sila si Edmar Cabo, 34, ug si Larry Cabo, 39, nga nakuhaan usab og 28 ka gagmay paketeng gidudahang shabu.

Laing nasikop mao sila si Carlo Paculaba ug si Rich Oca samtang nakasibat si Justin Mabala.

Didto sa sitio Magay, Barangay Tanke hayan ila sab nga nasikop si Armando Daan, 39, nga nakuhaan og 10 ka gagmay nga pakete sa shabu. - Pegeen Maisie M. Sararaña, CNU Intern (BANAT NEWS)