Duterte ngadto sa Alegria: Kamoy kinadatoan

CEBU, Philippines – Gipaandam ni Presidente Rodrigo Duterte ang mga taga Alegria sa posibleng pagdagsa sa mga tawo nga mobalhin og puyo sa lungsod karon nga gipaabot ang paglambo niini tungod sa produksyon sa lana didto.

Ang lana ug gas nga gikan sa Brgy. Montpeller nga gideklarar nga “commercially viable” gipaabot nga makadugang sa pundo sa lungsod kon makuha na ang share niini sa halin.

Gikan sa kinatibuk-an nga halin sa maong proyekto, ang barangay Montpeller makakuha of 14% share samtang ang LGU sa Alegria makakuha og 18% share.

Matud ni Duterte nga mas maayo ang Alegria oil field kon itandi sa Malampaya kay wala mahatag og tarong ang share nga alang unta sa probinsya sa Palawan nga P72 bilyones. Matud niya ang sa Alegria dako ang makuha sa gobiyerno.

“Kamo ang pinakadato,  the first outside Malampaya (natural gas). So prepare for massive migration. Ang tawo bisa’g asa ‘tong kwarta magtapok gyud na.....Prepare for an expansive human and economic development,” dugang sa presidente.

Gipasidan-an daan ni Duterte ang munisipyo sa Alegria nga mag-andam na daan og relocation sites tungod sa posibilidad nga aduna nay mga informal settlers nga mangabot sa ilang lungsod.

Apan nagkanayon si Duterte nga bisan pa man sa pagdaghan sa mga tawo  angay kining hangpon sa taga Alegria.

“But since you are Filipinos you should accommodate them.   And partake of the bounties of what God has given us. Do not forget others,” matud ni Duterte.

Si Duterte niabot sa oil field site sa alas 5:25 sa hapon ug iyang gipangulohan ang pagbukas sa valve sa “well head Christmas Tree” sa Polyard-3 Well timaan sa pagsugod na pagpagawas sa lana gikan sa ilawom sa yuta.

Si Alegria Mayor Verna Magallon nagkanayon nga ila na usab gipaabot nga modagsa usab ang mga investors sa ilang lungsod.

Si Magallon nagkanayon nga pinaagi usab sa ilang makuhang bahin ilaha usab palamboon ang mga programa sama sa livelihood program ug social services sama sa libre nga tambal ug assistance sa PWDs ug senior citizen.

Matud ni Magallon nga mamahimo usab nga magamit nila ang maong kita alang sa ilang water system project sa lungsod. (/IBM)(BANAT NEWS)