Nang-hack og fb nasikop

CEBU, Philippines – Nadakpan sa entrapment operation didto atbang sa usa ka mall sa barangay Kalubihan, Dakbayan sa Sugbo niadtong Biyernes sa hapon ang usa ka lalaki nga giingong nang-hack og facebook account ug gihulga nga iladlad ang mga law-ay nga hulagway sa tag-iya nga na-save didto.

Gidakop sa mga operatiba sa Regional Anti-Cybercrime Division  ang usa ka Charles Ikeen Diaz, 20, taga Barangay Tisa, Dakbayan sa Sugbo.

Butyag pa sa hepe sa maong opisina nga si Chief Insp. Leo Dofiles nga nakadawat sila og reklamo gikan sa usa ka 18 anyos nga babaye nga giingong gihulga siya sa suspetsado nga ipublikar ang iyang mga malaw-ay nga hulagway kon di siya mobayad og P10 mil.

Matud pa nga sa pagpadayon sa ilang komunikasyon gipaubsan sa suspetsado ang presyo ngadto sa P5 mil apan adunay pakapin nga pakighilawas, misugot ang biktima apan wala masayod ang suspek nga gisumbong na siya ngadto sa kapolisan.

Biyernes sa hapon nagkita ang duha atbang sa usa ka mall ug didto na na-entrap ang suspetsado.

Matud pa ni Dofiles gi-hack ni Diaz ang social media account sa uyab sa biktima pinaagi sa pagbutang og key logger sa usa sa mga computer sa usa ka internet shop diha sa Tisa niadtong Mayo 15 niining tuiga.

Sugod niadto, gisigehan na og chat ni Diaz ang maong 18 anyos nga biktima.

Kasamtangan pang gisubay kun diin nga computer shop namutang si Diaz og key loggers aron awhagon ang tag-iya nga mopasaka og kaso batok sa maong suspek. Kasong extortion in relation to cybercrime law ang ipasaka batok sa suspek. (/IBM)(BANAT NEWS)