CIDG nangayo og luna sa Kapitolyo

CEBU, Philippines – Nihangyo ang Criminal Investigation and Detection Group (CIDG) Central Visyas kang Gobernador Hilario Davide III nga mogamit sa luna nga gipanag-iya sa Probinsiya sa Sugbo sulod sa Camp Sotero Cabahug.

Ang hangyo gipaabot atol sa courtesy call ni Supt. Royina Garma, hepe sa CIDG-7, kang Davide. “Since yong CIDG Regional Office is already dilapidated, we need another building to accommodate us and be able to store and preserve evidences na meron kami,” matud ni Garma.

Ang tulo ka andana nga building nga planong itukod sa CIDG-7 anha ibutang sa 500 ngadto sa 600 metro kwadrado nga luna sa Kapitolyo sulod sa Cebu City Police Office (CCPO) Headquarters.

Matud ni Garma nga nakig-alayon na usab sila sa PNP Headquarters alang sa desinyo sa edipisyo nga butangan sa evidence room, quarter sa mga police personnel, ug basement parking area.

Kapin sa P39 milyones ang gibana-bana nga magasto sa maong building base sa program design sumala pa ni Garma.

“We will submit that sa PNP para malagyan ng pondo ng PNP,” matud ni Garma. Dugang niya nga ang gikinahanglan lang sa PNP nga requirement sa pagpagawas og pundo mao ang luna nga tukuran sa edipisyo.

Giawhag ni Davide ang CIDG nga mopadala og pormal nga suwat hangyo sa iyang buhatan. (/GMR)(BANAT NEWS)