BOPK midominar kontra Barug-PDP Laban

CEBU, Philippines – Gilauman na sa pipila ka mga konsehal sa Barug Team Rama Partido ng Demokratikong Pilipino-Laban nga midominar gyud ang Bando Osmeña Pundok Kauswagan (BOPK) sa bag-ohay lang natapos nga Barangay ug SK elections. Si Konsehal Joel Garganera miingon daghan nga mga kandidato nga kaalyado sa BOPK ang midaog sa eleksiyon tungod kay suportado sila sa kasamtangang administrasyon nga dunay igong resources.

Sa dihang si kanhi mayor Michael Rama pa ang mayor moabot sa 65 ka mga barangay ang kaalyado niya samtang 15 lang ubos sa kampo sa BOPK.

Karon sa kasamtangang administrasyon nga gipangulohan ni Cebu City Mayor Tomas Osmeña 49 ka mga kapitan niini ang midaog batok sa Barug Team Rama PDP-Laban nga 31 lang.

Ang mga barangay sa BOPK gilangkuban sa Bonbon, Babag, Buot, Basak Pardo, Buhisan, Calamba, Duljo Fatima, Guadalupe, Inayawan, Kinasang-an Pardo, Poblacion Pardo, Punta Princesa, San Nicolas Proper, Sawang Calero, Sinsin, Sudlon II, Tabunan, Sapangdaku, Labangon, Agsungot, Apas, Banilad, Binaliw, Busay, Capitol Site, Carreta, Cogon Ramos, Kamputhaw, Kasambagan, Lahug, Lusaran, Mabini, Mabolo, Malubog, Pahina Central, Paril, Pit-os, Pulangbato, Sambag 1, San Antonio, San Roque, Sirao, T. Padilla, Talamban, Tejero, Tinago, Zapatera, Hipodromo ug Kalubihan. Apan si Garganera miingon nga bisan kinsa man ang mahimong minority ug majority padayon gihapon sila mohimo sa ilang trabaho isip elected officials sa siyudad.

Si Konsehal Alvin Garcia miingon nalipay gihapon siya nga nakakuha gihapon sila og kapin sa napulo ka barangay sukwahi sa iyahang gilauman.

“I was very happy with the results of the barangay elections, I was not expecting 32 barangays to win actually because if you remember when Mike Rama was the mayor he had 65 barangay captains so I was assuming Mayor Osmeña would get at least 65 barangay captains,” sigon ni Garcia.

Gitataw ni Garcia nga wala ra sila mahulga nga ang administrasyon maoy modominar dili lang sa barangay apan lakip na sa City Council apan kini malaumon nga ang mga barangay kapitan mopili og kandidato pagka-ABC president nga angayan gyud sa posisyon.

Pabor sab si Garcia sa pamahayag ni Vice Mayor Labella nga si reelected Barangay Captain Phillip Zafra maoy i-endorsar isip kandidato sa pagka-presidente sa ABC kay haom kini ug daghan na kini og nahimo.

Samtang labot sa plano ni Cebu City Mayor Tomas Osmeña nga  mohatag og honorarium ug scholarship sa tanang elected Sangguniang Kabataan sa siyudad suportado kini nila ni Garganera ug Garcia. Apan gikwestiyon ni Garcia ang intensiyon sa mayor paghimo niini.  “Ang ako lang ba unsa naman ni double standard na pud ni siya di ba imong gitangtang sa 2016 kay dili imoha karon you are trying to woo votes you’re saying na sad imong i-grant? Ano ba talaga Mayor?  Tangtangon or ihatag? Kay pareha ra man ni sila barangay officials man ni, so again ang akoa lang ana, I support it 100 percent both the scholarship and  honoraria but again I’m questioning if the mayor has true intension and motive of actually helping the SK, mao ra gyud nang akoa,” sigon ni Garcia.

Sa dugang kalamboan, nanumpa kagahapon sa hapon kang Osmeña si reelected Guba Barangay Captain Orlan Herrera ug hingpit na kining nahimong miyembro sa BOPK.

Kauban ni Herrera pagpanumpa ang mga konsehales niini nga sila si Alexander Bontilao, Richel Erana, Yvonne Miñoza, Teodoro Borbon, Antonio Miñoza Sr., Nelson Gabunada ug Julito Ardiente ingon man ang Sangguniang Kabataan officials sa lugar pinangulohan sa Chairman Shaira Miñoza. Ang leader sa oposisyon nga si Rama miingon nga dugay nang gipangulitawhan sa pikas kampo si Herrera.

Matud niya dili na kabahin matod sa 31 ka mga kapitan sa ilang grupo si Herrera ug di kini makaparalisar kanila. (/IBM)(BANAT NEWS)