Mga kolorum nga sakyanan nahimong problema sa turismo

CEBU, Philippines – Nahimo na karong problema sa industriya sa turismo ang mga pribadong van nga giingong mamasahero bisan og walay permiso gikan sa Land Transportation and Franchising and Regulatory Board (LTFRB-7). Si Bise Gobernador Agnes Magpale nagkanayon nga nagkadaghan ang ilang problema sa maong mga sakyanan.

Giingong gawas sa mga kolurom nga van nakadawat sila og taho nga adunay mga pribadong van nga mamasahero na usab pinaagi sa pakyaw pagsuroy diha sa mga tourist destination sa lalawigan sa Sugbo.

Nabalaka si Magpale nga modaghan kini hilabina karon nga bakasyon ug nidaghan ang mga turista nga nibisita sa probinsiya sa Sugbo.

Giangkon  ni  Magpale nga lisod masubay ang maong sakyanan tungod kay adunay uban nga  pribadong van nga makigsabot lang sa mga turista hilabina nga paryente lang ang mosuroy ug adunay internal nga kasabotan kalabot sa paggamit sa van.

Si Magpale niawhag sa mga turista nga maayo nga moagi sila sa mga lisensyado nga transportation services aron usab luwas ang ilang pagsuroy sa tibuok lalawigan sa Sugbo. (/BDB)(BANAT NEWS)