Wire naputol, bata nakuryentihan patay

CEBU, Philippines – Patay ang 7-anyos nga bata human nakuryentihan sa linya nga naputol gikan sa poste alas 8 sa buntag niadtong Martes sa may Sitio Lower, Toong, bukirang bahin sa Dakbayan sa Sugbo.

Ang biktima naila nga si Roel Serito Jr, residente sa maong lugar.

Nakadawat ang kapolisan og taho gikan sa usa ka Sherlita Villarin, 46, residente sa maong lugar, labot sa maong insidente.

Base sa imbestigasyon sa kapolisan nga gipangulohan ni Senior Police Officer 3 Rommel Bancog ngadto sa informant, nakabantay kini nga ang secondary live wire sa usa ka power company nga nakakonektar sa poste duol sa iyang balay ang naputol.

Dali siyang nanawag sa power company aron ayuhon ug nipahimangno usab siya sa pipila ka nangagi nga magbantay sa linya sa kuryente nga nakaali sa agianan kay buhi kini.

Daku na lang ang ilang kahikurat dihang iyang nakita ang bata nga nakuryentihan na sa maong linya sa kuryente diin dali usab unta kining gisusi sa Emergency Medical Services (EMS) Team nga niabot sa lugar apan wala na kini kinabuhi.

Ang patay’ng lawas sa bata anaa na sa punerarya aron ipaubos sa autopsy. (Shaira Gwen T. Laluna /GMR)(BANAT NEWS)