Kandidato mipasaka og kaso batok sa kaatbang ug mayor

CEBU, Philippines — Mga kandidato sa Barangay Poblacion 1, Carcar City mipasaka og reklamo ngadto sa Commission on Elections (Comelec) batok sa ilang mga kaatbang aron ipa-disqualify tungod sa giingon nga pagpamalit og boto nga paglapas sa Omnibus Election Code.

Si Loufel Aleonar, kandidato sa pagka kapitan pormal nga nipasaka gahapon sa iyang affidavit complaint ngadto sa opisina ni City Election Officer, nga si Atty. Chauncey Boholst.

Ang  iyang gireklamo mao sila si konsehal Baltazar Rojo nga nidagan pagka kapitan; Nestor Bargayo, Ekoy Emnace, Falax Cuizon, Edwin Barcenas, incumbent nga barangay kapitan Lucky Varga, Cecil Barawidan ug Eva Alicaba nga managan pagka kagawad.

Ang reklamo ni Aleonar gisuportahan sa joint affidavit complaint nilang Julius Sarmiento, Edsel Padin, Leo Alfafara, Elmer Padin, Salvador Apil ug Leonila Cinco-Sato nga usa pud sa mga kandidato sa pagka kagawad.

Kining reklamo base sa insidente kaniadtong Mayo 11, sa alas 5:00 sa hapon sa Upper Cogon, Poblacion 1, Carcar City diin giingong adunay nahitabong vote-buying nga nahitabo nga gidudahan nilang may kasayoran si Mayor Nicepuro Apura.

Sila si Alberto Bendanillo Jr. ug si Alcherlee Ocampo namasangil nga ilang nasakpan ang mayor ug uban pa gipangreklamong mga kandidato nanghatag og P700 matag-usa nila ni Jaymar Martorillas ug Janet Benoya, kauban sa maong kwarta ang listahan sa mga kandidato sa mayor.

Matud pa ni Aleonar nga samtang si Bendanillo ug Ocampo nigukod sa nanagan miadto siya sa balay ni Berdin aron sa pagsukmat kang Apura mahitungod sa insidente apan wala kini moangkon.

Gilimod ni Mayor Apura ang pasangil nga vote buying apan siya niangkon nga nagkita sila ni Aleonar sa balay ni Berdin diin aduna silay pulong-pulong uban sa poll watchers.

“Admit gud tawn, wa siya hilanti? Wa siya kuyapi? Kung mamalit man ko, adto na lang ko sa akong anak nga nidagan og kapitan sa Valladolid. Nganong laing tawo man akong gastuhan?” sumala pa ni Apura ngadto sa Banat News.

Ang maong insidente gi-report sa Carcar Police Station diin kini nabutang sa police blotter. - Cherry Ann Fornez ug Ericalene Tanudtanud (BANAT NEWS)