Vote buying, pito nasikop

CEBU, Philippines — Daghang mga nadawat nga mga report ang kapolisan ug bisan sa social media nagpasad ang mga posts bahin sa mga kandidatong namalit og boto sugod niadtong Sabado sa hapon hangtud na kagahapon atol sa piniliay.

Sa Bantayan, pito ka mga lalaki ang nadakpan human gikatahong naaktohang namalit og boto sa barangay Botigues adtong Sabado sa gabii.

Ang mga dinakpan mao silang Junrey Daruca ,31, Androw Cesa, 21, Roger Cañete, 24, Ronel Ejorango, 37, Jomer Ejorango, 31, Jessril Ejorango, 29, ug si Norgel Guzat, 21 , taga Sitio Looc sa maong barangay. Nakuha gikan kang Cesa ang pugakhang ug upat ka sobre nga may sulod nga sample ballots sa usa ka kandidato nga gisukipan og P50. Susamang sobre ang nakuha gikan sa iyang mga kauban.

Matud sa Bantayan Police Station adunay misumbong nga namalit og boto ang grupo diha sa maong dapit.

Didto sa dakbayan sa Lapu-Lapu adunay report nga pagpamalit og botos diha sa barangay Pajac.

Samtang si Senior Police  Officer 1 Laurencio Wagwag sa Cordova Police Station miingon nga ilang girespondehan niadtong alas 9 pasado ang takna sa Domingo sa gabii ang report bahin sa vote buying sa Barangay Alegria apan wala silay naabtan didto. Miresponde usab sila sa Ibabao apan sa gihapon wala silay naabtang nag vote buying.

Sa social media, daghang mga gi-post nga giingong mga sobre nga adunay pasupot nga kwarta gikan P20 hangtud P500 kauban ang mga sample ballots sa mga kandidato nga pabotaran ang gipanghatag sa pipila ka mga barangay. (BANAT NEWS)