Loot girakrakan

CEBU, Philippines — Girakrakan sa wa pa mailhing mga lalaki ang pumpboat nga gisakyan ni Daanbantayan Mayor Vicente Loot uban sa iyang pamilya sa dayon na nilang pagdunggo diha sa New Maya Port, sa maong lungsod kagahapon sa buntag.

Apil sa girakrakan ang Grandia van diha sa pantalan nga sakyan unta sa pamilya sa mayor. Duha ka wala mailhing mga lalaki ang giingong mihimo sa maong krimen.

Naangol ang duha ka mga drayber ni Loot nga silang Arnel Rosario, 47, ug si Ruben Castañeda,50, katabang nga si Jerly Rossel, 26, ug ang porter nga si Bernabe Ypsor, 58.

Luwas hinuon ang mayor ug ang iyang pamilya nga gilangkoban sa iyang asawa nga si kanhi mayor Maria Luisa Loot; anak nga si Board Member Sun Shimura; asawa niini, Kerrie Keane Shimura; lima ka mga apo ni Loot ug uban pang mga kauban sa pamilya diha sa ilang balay.

Nakuha sa kapolisan diha sa crime scene ang 19 ka mga basiyo sa bala sa M16 rifle.

Tungod niini gimando ni Police Regional Office-7 Director Chief Supt. Robert Quenery nga mogama og task group nga motutok sa kaso.

“I directed the PD (Provincial Director) to provide security personnel to ensure the security and safety of Mayor Loot and his family. An SITG (Special Investigation Task Group) headed by the DRDO (Deputy Regional Director for Operations nga si  Senior Supt. Dennis Agustin) and assisted by the CIDG (Criminal Investigation Detection Group) has been organized to investigate the incident,” matud pa sa maong heneral.

Ang tigpamaba sa Cebu Provincial Police Office (CPPO) nga si Supt. Virgilio Bayon-on nagkanayon gikan pa sa isla sa Malapascua ang pamilyang Loot.

Ang duha ka mga lalaki giingong nisakay sa nagpaabot didto sa unahan nga usa ka puti nga van nga may plakang “5884.” Dali nga gidala sa tambalanan ang mga nangaangol.

“Additional PNP personnel have been sent to the town to ensure a safe BSKE (Barangay-Sangguniang Kabataan Elections). Despite the incident, we forsee that the election in Daanbantayan will push through peacefully,” matud pa ni Quenery.

Sa iyang bahin, si kanhi mayor Maria Luisa Loot emosyonal nga nahinabi sa Banat News pipila ka oras human sa hitabo, miingon nga nagtuo ra sila nga rebentador kini apan iyang nakita nga nagkadugo ang tiil sa iyang yaya.

Dugang pa ni Loot, wala sila magdahom niini kay wala man sila’y kontra ug gani wala sila’y security nga mga kuyog.

Siya midugang nga base sa kasayuran nga ilang nakuha dul-an sa tulo ka adlaw na nagbalik-balik sa Maya Port ang maong mga lalaki.

Dili siya motoong may kalabotan sa mga pasangil batok sa iyang bana pagkalambigit sa illegal drug trade ang motibo. Ang mayor usa sa gipangalanan ni Pres. Duterte nga drug protector, apan ang mayor mihimakak niini ug matud pa gi-clear na siya sa PNP kay di kini tinuod. Politika gyud ang ilang gituohang motibo sa pagpamanhig.

Mihangyo ang kanhi mayor kang Duterte nga hatagan sila og security escort para sa ilang pamilya. Awhag ni Loot sa ilang mga kaatbang nga dili amongon ang iyang pamilya kay wala sila’y sala ug sila igo rang nanerbisyo.

Samtang si Mayor Loot sa iyang bahin, niawhag sa tanang mga law enforcers nga mohimo og lawom nga imbestigasyon sa nahitabo.  Andam usab magpatabang si Loot sa iyang mga classmates ug mga suod nga higala aron ilhon ang mga nagpaluyo sa pagpamanhig kanila. (BANAT NEWS)