Patay sa bangga wala pa mailhi

CEBU, Philippines – Patay ang usa ka drayber sa motorsiklo human sa nahitabong panagbangga sa mga sakyanan diha sa Barangay Poblacion, lungsod sa Minglanilla kagahapon sa kadlawon.

Ang maong patay nga lalake wala pa kini mailhi diin aduna kini mga patik sa lawas ug hingkod ang pangidaron.

Samtang ang drayber sa dumptruck nga gikabangga niini mao si Hernando Bonifacio, Jr., 34-anyos, taga dakbayan sa Toledo.

Base sa imbestigasyon sa kapolisan sa Minglanilla Police Station nga ang dump truck ug motorsiklo nagbiyahe kini paingon sa opposite nga lugar.

Giingong ang motorsiklo kusog ang dagan niini ug mi-overtake sa nag-una niya nga sakyanan ug nagkabangga kini sa dump truck nga diha sa pikas lane.

Sa laing bahin, napalgan diha sa usa ka bakanteng luna sa Barangay Togonon, dakbayan sa Danao sa usa ka barangay tanod sa maong lugar ang patay’ng lawas sa usa ka tiguwang lalake.

Si Police Officer One Gypsy Miro sa Danao Police Station miila sa namatay nga mao si Pedro Lawas, 65-anyos, residente sa maong  dapit.

Giingong niadtong miaging adlaw nananghid si Lawas sa iyang sakop sa pamilya nga moadto sa  ilang umahan apan wala kini mahiuli. (Romeo T. Limpangog/BDB)(BANAT NEWS)