Probinsiya kuwangan pa og 28 ka drug cleared barangay

CEBU, Philippines – Ang probinsiya sa Sugbo nagkinahanglan kini og dugang 28  ka barangay nga madeklara nga drug-cleared aron makadawat sila karong tuiga og Seal of Good Local Governance (SGLG) award gikan sa Department of Interior and Local Government (DILG).

Base sa gikinahanglan nga rekisitos ubos sa peace and order criteria, kinahanglan nga 20 porsyento sa kinatibuk-an nga gidaghanon sa barangay sa usa ka lalawigan ang nadeklarar na nga drug-cleared.

Ang probinsiya sa Sugbo  aduna kini 1,066 ka barangay ug nagpasabot nga kinahanglan nga 213 ka barangay ang madeklara nga drug cleared sa tibuok lalawigan aron nga makab-ot ang 20 porsyento.

Sa pagkakaron adunay 185 ka barangay sa probinsiya ang drug cleared apil na ang 25 nga bag-o pa nga gideklara kulang pa og 28 ka barangay aron nga makab-ot ang 20 porsyento sa 1,066 ka barangay.

Sa uwahing semana   niining buwan sa Mayo o sa buwan sa Hunyo gipaabot nga magsugod na ang DILG sa assessment o pagsusi niini sa mga rekisitos nga kinahanglan nga i-comply sa mga LGUs aron makakuha sa SGLG award.

Si Gobernador Hilario Davide, III sa iyang bahin, nagkanayon nga maningkamot sila apan dili nila ipugos kon ugaling dili nila makuha ang rekisitos.

Matud ni Davide nga ang SGLG award usa na lang ka bonus nga gihatag sa DILG alang sa mga LGUs nga naningkamot nga maayo ang serbisyo.

Ug matag tuig adunay mapuno nga rekisitos nga kinahanglan i-comply sa mga LGU aron makakuha sa nahisgutang award.

Sulod sa tulo ka tuig ang probinsiya sa Sugbo nakadawat og SGLG award sa provincial level sukad niadtong tuig 2005. (/BDB)(BANAT NEWS)