Vote buying sa Carcar?

CEBU, Philippines – Kandidato pagka kapitan namasangil sa iyang kaatbang nga namalit og boto pinaagi sa sample campaign flyers nga gipakapinan og kwarta nga gipangapud-apod diha sa mga molupyo sa Barangay Poblacion Uno sa dakbayan sa Carcar.

Si Dr. Loufel "Yho" Aleonar nagtinguha nga mopasaka og kaso sa iyang kaatbang ug kang Mayor Nicepuro Apura tungod sa matud pa paglapas sa Omnibus Election Code.

Matud pa ni Aleonar gusto lang unta siya og hapsay, malinawon , limpyo ug matinud-anon nga eleksyon mao nga usa siya sa mga misugot sa covenant signing kauban ang ubang mga kandidato.

Sumala pa ni Aleonar, nakadawat siya og impormasyon nga adunay vote buying sa sitio Maximina maong iya kini giadto ug nakurat siya kay matud niya iyang nakita si Mayor Nice Apura ug pipila ka mga opisyal lakip ang mga kaatbang niya sa politika didto. Nasagmuyo siya kay non-partisan man unta ang barangay elections.

Matud ni Aleonar nanguha siya og video apan dihang nakabantay ang mga tawo naglumbaanay sila og pangikyas apil ang maong mga opisyal ug nabiyaan pa ang ubang mga sample ballots nga adunay nakapilit nga kwarta nga iya usab gidala sa kapolisan.

Si Aleonar nanawag sa kapolisan sa siyudad apan giingong wala ra usab manukit-sukit pag-abot didto. Tungod niini, nagpa-blotter na  lang sila sa police station bahin sa giingong vote buying.

Si Aleonar nitug-an nagkaestorya pa sila ni Supt. Gregorio Galsim ug giingnan lang siya nga mas gitutokan nila karon ang drug operations ug di vote buying. Gisubay sa Banat News ang Carcar Police Station aron makuhaan og pamahayag si Galsim apan wala kini didto kay nitambong sa command conference.

Apan si Police Officer 2 Celso Yanong, Desk Officer sa Carcar Police Station miingon nga makadaghan na sila nakadawat og mga taho nga may labot sa vote buying apan ini og abot nila sa lugar wala na silay maabtan.

Giklaro niya nga bisan yano nga report nga ilang madawat ilaha kining girespondihan ug andam sila modakop sa namalit og boto.

Samtang didto sa police station ang Banat News, nakadawat og sumbong ang mga polis bahin sa laing vote buying sa barangay Ocaña nga gipadad-an usab nila dayon og mga polis.

Gisuwayan sa Banat News pagkuha og pamahayag si Mayor Apura apan dili kini motubag sa iyang cellphone. Usa sa staff niini nga gitawagan ug nitubag ang nipadayag nga natulog pa ang mayor ug pagaw ang tingog sa opisyal. (/IBM)(BANAT NEWS)