Campaign ads gipangbaklas

CEBU, Philippines – Nikabat sa 150 kilos kon 500 kabuok campaign materials ug commercial ads ang nakolekta atol sa Operation Baklas kagahapon sa Department of Environment and Natural Resources.

Kini gipangulohan nila ni Emma Melana, assistant regional director for management services; Ariel Rica, chief enforcement division, Raul Pasoc, Community Environment and Natural Resources Officer sa DENR.

Ang mga nasakmit nga illegally posted materials naglangkub kasagaran sa mga commercial ads diin mga tarpaulin nga nikilo og 61 kilos, 32 kilos nga plywood, 35 kilos nga kabilya ug 12 kilos nga election paraphernalia.

Ang Operation Baklas gikuyogan sa mga representante sa mga rehiyonal nga buhatan sa DENR, Department of Public Works and Highways, Department of Interior and Local Government ug Cebu City Police Office.

Kini gipahigayon sa Barangay Guadalupe, Labangon, Quiot Pardo, Basak San Nicolas, Lahug, Camputhaw ug Zapatera sa Dakbayan sa Sugbo.

Samtang sa Dakbayan sa Mandaue mao ang Guizo, Maguikay, Tingub, Canduman, Cabangcalan, Alang-alang ug Subangdaku.

Nasakmit sab ang dili mominus napulo ka kilo nga lansang nga gilansang sa mga punoan sa kahoy. (/GMR)(BANAT NEWS)