Mayor sa Toledo gikiha sa mga konsehal

CEBU, Philippines – Ang mga konsehal sa dakbayan sa Toledo mipasaka kagahapon og daghang kaso didto sa Ombudsman batok ni Acting Mayor Antonio Yapha Jr. ug ni City Legal Officer Teresito Largo.

Ang mga gipasakang kaso naglangkob sa gross ignorance of the law, grave misconduct, grave abuse of discretion amounting to lack of excess of jurisdiction ug conduct grossly prejudicial to the public service.

Matud sa mga reklamante nga sila si Yapha ug Largo nakalapas usab sa mga lagda sa 2014 Omnibus Rules of Appointments sa Civil Service Commisson.

Gipasanginlan usab nila si Yapha ug Largo nga nakahimo’g kalapasan sa mga lagda sa Republic Act 6713, kun Code of Conduct and Ethical Standards for Public Officials and Employees ug Ombudsman Act.

Matud ni Atty. Inocencio dela Cerna nga maoy abogado sa mga konsehal nga ang kaso nagumikan sa pagtudlo ni Yapha kang Largo bisan pa wa siya hatagi og katungod sa City Council nga maka-appoint sa abogado.

Katulo na nga gitudlo ni Yapha si Largo sa katungdanan bisan walay pagtugot sa konseho.

“It is the money of the city government of Toledo and it is being disbursed to a private individual who has no authority on whatsoever to assume the office of the city attorney," matud ni Dela Cerna.

Si acting Toledo City Vice Mayor Marjorie Perales nagkanayon nga wala nila aprobahi ang appointment ni Largo tungod sa issue sa "trust and confidence".

Apan matud ni Largo nga wala’y basehanan ang pagpasaka kaniya og kaso sa konseho kay aduna siya’y kwalipikasyon isip city legal officer. Iyang gituohan nga ang panagbangi sa politika mao gyud ang rason nga siya ug si Yapha gipasakaan og kaso sa mga konsehal.

Matud ni Largo nga andam niyang tubagon ang kaso, apan ang mga reklamante miingon nga nanghinaot sila nga si Yapha suspensuhon sa Ombudsman, samtang si Largo taktakon sa pwesto.

Ang nasuspenso nga mayor sa Toledo City nga si John Henry Osmeña miuban sa mga reklamante sa pagpasaka og kaso didto sa Ombudsman kagahapon. (/RUB)(BANAT NEWS)