Kaso sa dengue ningminos

CEBU, Philippines — Ningminus ang kaso sa dengue sa Sugbo base sa dengue statistics nga gipakita sa Provincial Health Office (PHO).

Nagkanayon si Cyril Kay M. Pangatungan, PHO Nurse II, nga kini base sa natala gikan sa buwan sa Enero hangtud karong buwana itandi sa susamang buwan sa niaging tuig.

Matud ni Pangatungan nga ang kaso sa maong sakit mogamay sa pag-abot sa buwan sa ting-init.

Base sa dengue statistics adunay natala nga 724 ka kaso sa buwan sa Enero hangtud sa Abril karong tuiga diin mas gamay kaysa susamang mga buwan sa niaging tuig.

Ang nag-unang napulo ka lugar nga adunay ubay-ubay nga kaso sa dengue mao ang Talisay City, Consolacion, Danao City, Argao, Toledo City, Liloan, Minglanilla, Carcar, Naga ug Badian.

May natala sab nga upat ka namatay sa maong sakit nga pulos mga bata.

Adunay namatay sa Danao City nga nagpangedaron og 9-anyos, usa sa Argao nga nagpangedaron og walo ka buwan, usa sa Sogod nga nagpangedaron og 11 ka bulan ug usa sa Naga City nga nagpangedaron og napulo ka buwan.

Nagkanayon si Tardy Guardiario, laing PHO Nurse, nga nakig-alayon sila sa Department of Education (DepEd) alang sa pag-apil sa ilang diskusiyon mahitungod sa dengue ug ang life cycle sa lamok aron makahibawo ang mga bata kung unsaon paglikay sa maong sakit.

Nagkanayon usab siya nga aduna silay gi-promote nga OB trap, usa ka lifetime trap nga kun mangitlog ang lamok sa maong trap dili na mo-develop ang mga itlog ug mapugngan ang pagdaghan sa lamok.

Aduna silay dengue days caravan o dengue awareness nga ipahigayon karong umaabot buwan sa Hunyo. (Flaire A. Bayalas, CNU Intern/GMR) (BANAT NEWS)