Mama nga misuway og suborno sa polis sikop

CEBU, Philippines — Nadakpan sa entrapment operation ang usa ka inahan human kini gipasanginlang nisuway og suborno sa mga pulis sa Station 1 sa Pari-an Police Station ning dakbayan sa Sugbo.

Si Yvonne Lyra Grandea Ho, 49, usa ka negosyante nga taga Junquera Extension, Barangay Santa Cruz,  giingong niadto sa police station alas 5:45 kagahapon sa buntag kay makig-areglo ug mohatag og kwarta aron pagawson iyang anak nga nadakpan.

Nibalik kini sa estasyon alas 6:35 nga adunay dala nga P20 mil isip bribe money aron makagawas ang iyang anak nga si Crisreb Padilla Chavez, 26, nga nagpuyo sa Sitio Riverside, Barangay Lorega- San Miguel nga nadakpan kauban ang laing lima ka tawo kaadlawon anang adlawa atol sa buy bust operation ug pagduwa og tong-its.  Si Ho giaresto nilang PO1 Nickson Miranda ug PO1 Edgar Delos Santos human niini gitunol ang kwarta. CNU Intern/IBM (BANAT NEWS)