Nasunogan sa Pasil gihatagan na og tabang pinansiyal

CEBU, Philippines — Nang apod-apod kagahapon og tabang pinansiyal ang Department of Social Welfare and Services (DSWS) ngadto sa mga biktima sa sunog sa Barangay Pasil, dakbayan sa Sugbo.

Si Lea Japson pangulo sa DSWS nagkanayon nga ang kantidad sa gipang-apod-apod nga tabang pinansiyal magdepende kon sila mao’y tag-iya sa balay o mipuyo lang o nag-abang .

Mahinumduman nga adunay 360 ka panimalay ang naapektohan sa sunog niadtong Enero 14 karong tuiga diha sa Sitio Lawis, Barangay Pasil.

Adunay 822 ka beneficiaries ang makapahimulos sa tabang pinansiyal nga ihatag sa DSWS.

Ang mga tag-iya sa balay makadawat og P20,000 samtang ang sharer o renter makadawat og P10,000.

Dugang ni Japson ang ubang tag-iya sa balay nga nasunog nakadawat na og napulo kabuok nga plywood ug napulo ka pligo nga sin.

Matud ni Josephine Paca, 69-anyos, usa sa mga nasunogan kinsa emosyonal nga miasoy nga dako gyud ang natabang niini kanila sanglit sama sa uban wala pa usab siya nakapabarog sa iyang balay.

Lakip sa mihatag kanila og hinabang mao ang Department of Labor and Employment (DOLE), Don Bosco Training Center ug si Senator Pia Cayetano.

Gitataw sa operation head sa Department of Welfare for Urban Poor (DWUP) nga dili tanang biktima sa sunog ang mahatagan og relocation site kadto lamang mga homeowners nga naigo sa project sa Department of Public Works and Highways (DPWH)  ang gigahinan  og relocation site ngadto sa Barangay Quiot, Pardo, dakbayan sa Sugbo apan kinahanglan una nilang makompleto ang mga rekisitos una sila makabalhin sa maong luna.

Ang pagpang-apod-apod sa tabang pinansiyal gikan sa DSWS nagsugod kagahapon ug hangtud kini sa Miyerkules, Abril 25 .

Ang mga beneficiary gikinahanglan nga magdala og assessment form gikan sa DSWS ug valid ID pagpamatuod nga usa sila sa mga biktima sa sunog. - Jhan Nysse Capus, CNU intern ug Jade Aura Mojado, PIT Intern (BANAT NEWS)