Nalatayan sa trak namatay

CEBU, Philippines – Patay ang usa ka lalaki human natumba ang gisakyang motorsiklo kauban ang mga igsuon dihang kini nalatayan sa trak nga ilang gisuwayan og overtake diha sa barangay Mantalongon, lungsod sa Dalaguete niadtong Huwebes sa gabii.

Ang nakalas mao si Arnel Amamangpang,25, samtang nangaangol ang mga  igsuon niining silang Arnold  21, drayber sa maong motorsiklo ug Dionisio ,30, ug ang ilang 15 anyos nga pag-umangkon nga si Jobert Costanilla, pulos taga Sitio Gran China sa maong barangay. Samtang ang nagmaneho sa Mitsubishi Fuso Truck nga may kargang mga utanon mao si Jonard Rodrigo Geolin,30, residente sa Sitio Lahug sa maong barangay.

Sigun pa ni PO3 Bobby Naces, sa Dalaguete Police Station nag-angkasay ang upat sa usa ka motor nga walay plaka, paingon na pauli sa ilaha, apan pag-abot sa nahitaboan, gisuwayan nila og overtake ang trak nga gimaneho ni Geolin.

Apan giingong nakuyawan ang drayber sa motor pagkakita nga duna sila kasugat sa pikas nga lane maong nawad-an kini og kontrol dayon natumba.

Si Arnel kinsa naa sa pinakatumoy nalagpot ug naligsan sa ligid sa trak samtang nangabun-og ug pangos ang tulo ka mga kauban niini.

“Naipit kuno sa ilawom sa de-karga (si Arnel). Pag-atras, kay gipaatras man sa mga tawo kay aron lagi kuno nga makuha siya sa ilawom, nalatayan na nuon samot,” matud pa sa maong polis. Gisuway pa sa pagdala sa tambalanan ang biktima apan didto gideklarar kining dead on arrival. (Kathleen Kaye G. Gonzaga, CNU Intern/IBM)(BANAT NEWS)