Narelibo nga mga Polis nigradwar na

CEBU, Philippines - Natapos na ang Re-Training and Moral Recovery Program sa 34 ka polis nga gipangrelibohan gikan sa Parian Police Station.

Si Police Regional Office-7 Director, Chief Supt. Robert Quenery, atol sa closing ceremony kagahapon nipadayag nga gikinahanglang itrato sa polis nga pamilya ang usa’g-usa diin bantayan nila nga dili mahisalaag ang usa.

"Evil will triumph if good men do nothing. Treat your work as a vocation not just a job but also calling, place your lives on the line so that others may live,” matud sa heneral.

Atol sa press conference, si Quenery niingon nga adunay memorandum gikan sa Kampo Crame nga ipangrelibo gyud ug ipaubos sa recovery program ang tanang polis bisan pa man usa o duha lang nila ang adunay bug-at nga sala.

Andam na sab ipakatap ang maong mga polis karon nga nigradwar na sila sa maong programa.

Sigun pa sa direktor sa Cebu City Police Office, Senior Supt. Joel Doria, nga hayan ipamutang ang maong mga polis sa ablihang Police Community Precinct sa I.T Park ug Hipodromo ubos sa Mabolo Police Station.

“Ni-recommend na natin kay RD na it will be manned by 21 police officers each community precinct,” matud ni Doria.

Ang 40 ka polis sa Parian lakip na ang hepe niini nga si Chief Insp. Ramoncelio Sawan girelibuhan human nadakpan sa entrapment operation ang usa kanila nga si PO3 Ritchie Saquilabon kinsa giingong nangilkil sa pamilya sa ilang dinakpan sa kaso sa drugas kauban ang laing duha pa ka polis. Ang hepe nipatin-aw nga 34 ra ang nigradwar sanglit ang tulo naglakip na ni Saquilabon ug laing duha ka gikatahong kauban niini sa maong pagpangilkil ang natangtang.

Laing tulo ang gipangrelibuhan sab sanglit matud ni Sawan nga adunay counter-intelligence report nga aduna sab silay laing bug-at nga sala.

Si Sawan ang nangulo sa maong recovery program inabagan ni Reverend Director Philip Bartolba, chairman sa Ethics and Discipline ug direktor sa PNP Values Formation Council Inc. Visayas Area.

Si Sawan nitataw nga dili na siya ang mangulo sa maong mga polis kun idestino na sila sa community precinct sanglit gidestino na siya karon sa Police Strategy Management Unit sa CCPO headquarters. (/GMR)(BANAT NEWS)