P20 milyon nga inprastraktura gihatag ngadto sa Dumanjug

CEBU, Philippines — Sobra sa P20 milyones nga kantidad sa infrastructure project ang gi-turnover sa probinsiya sa Sugbo ngadto sa unom ka barangay sa lungsod sa Dumanjug.

Ang maong mga pryoekto gilangkuban kini sa karsada, classrooms ug day care centers diin duha ka classroom nga nagkantidad og P2.1 milyones ang giturn-over ngadto sa Tubod-Dugoan Elementary School; 15 ka kilometro nga karsada gikan sa sentro sa Dumanjug, laing duha ka classroom usab nga moabot sa P1.98 milyones ang kantidad gi-turnover ngadto sa Balaygtiki Elementary School.

Pormal usab nga gibuksan ang nakonkreto nga dalan gikan sa Barangay Ylaya paingon ngadto sa Kantangkas hangtud sa Pawa nga moabot sa P13.96 milyones ang kantidad niini.

Tulo usab ka barangay ang aduna na’y day care center diin sa Barangay Bullogan gi-turnover ang usa ka day care center nga mokabat ngadto sa P715,239 ang kantidad, sa Barangay Kantangkas nagkantidad og P730,150 ug laing day care center usab ang gi-turnover sa Barangay Cotcoton nga moabot ngadto sa P538,798.

Si Gobernador Hilario Davide, III uban si 7th district Congressman Peter John Calderon, Bokal Christopher “Dong” Baricuatro ug Dumanjug Mayor Rene Asentista maoy nagkuyog sa pag-turnover sa maong mga proyekto.

Ang maong mga barangay nga nakabenepisyo sa nahisgutang mga proyekto nahimutang kini diha sa bukirang bahin sa lungsod.

Subay niini, sa lungsod sa Catmon gi-turnover usab sa probinsiya uban sa Ramon Aboitiz Foundation Inc. ang mga school building nga moabot tanan ngadto sa P11.694 million ang kantidad.

Naglakip kini sa tulo ka classroom building sa Cabungaan Elementary School sa Barangay Cabungaan diin mokabat ngadto sa P2.837 ang kantidad niini.

Mikabat ngadto sa P8.857 milyones ang kantidad sa mga bag-ong gi-restore nga 10 ka lawak sa Gabaldon building sulod sa Catmon Integrated School. (BDB) (BANAT NEWS)