Jetski, Porsche gisakmit
CEBU, Philippines — Duha ka jetski ug usa ka Porsche sports car luwan sa usa ka 40-footer container van ang nasakmit sa mga tinugyanan sa Bureau of Customs human wala gideklarar ug kuwang sa mga dokumento.
Ang jetski nagkantidad og P400 mil matag-usa samtang ang Porsche nga 2-door 2008 model nagkantidad og P1.5 million ug giingong kuwang sa DTI Certificate of Authority to Import subay sa balaud.
Nangulo sa pag-abli sa container van si Customs Commissioner Isidro Lapeña uban nila ni Cebu District Collector, Atty. Elvira Cruz.
Matud ni Lapeña nga hayan malakip sa pagpaguba ang sports car kung mahuman na ang imbestigasyon niini samtang ang mga jetski susihon kung asa kini mahimong madonar.
Gitug-an ni Lapena nga padayon nga hugot ang ilang pagsusi sa tanang mga malapason ug giawhag ang mga magpapatigayon nga ideklarar ang tanan nilang kargamento tungod kay padulong man gihapon sa katawhan ang ilang kita sa BOC.
Gitun-an sab karon ang mga kaso nga ipasaka sa consignee ug posibleng matangtangan gyud sa ilang lisensya ang mga brokers niini.
Nigahin ang BOC og P1.4 billion alang sa pagpalit og 56 ka X-ray machines nga daku kaayo og tabang sa pagsusi sa mga kontrabando.
Gitug-an ni Lapena nga sukad sa iyang paglingkod sa BOC adunay daku nga pagkunhod ang problema sa smuggling sa Sugbo. (GMR) (BANAT NEWS)
- Latest
