Pure Heart

CEBU, Philippines — Malisud ang dalan nga iyang gibaktas paingon sa kalampusan. Gibabagan kini sa kawad-on nga misuway paggun-ob sa iyang pangandoy. Apan wala gayud siya matarog, gumikan kay taliwala niining tanan mao ang malig-on niyang pagsalig sa Ginoo nga maoy nituboy kaniya sa iyang nahimutangan karon.

Kini ang istorya sa kinabuhi ni Atty. Jesus Velez, 45 anyos, kinsa working student kaniadto ug karon enhinyero, abogado,university director ug konsehal sa lungsod sa Minglanilla.

Ikatulo siya sa lima ka managsuon. Kanhi nag-alagad sa usa ka insurance company ang iyang amahan, samtang nagdumala og sari-sari store ang iyang inahan. Nilang mga managsuon, siya ra ang dili honor student.

“Studios man sila, niya ako man molihok sa buhatonon sa balay, sila pokus sa pagtuon,”niya pa ngadto sa Banat News Tingusbawan.

Wala siya’y balon sa iyang pagtungha kaniadto, librehon lang matud pa siya sa iyang classmates sa recess kay iya mang pakopyahon hilabi na sa Math subject.

Niadtong Grade 6 na siya, nawagtangan og trabaho ang iyang amahan human nalugi ang kompaniya nga gialaragan niini, busa nisamot kalisud ang ilang kahimtang. Pagtapos niya sa elementarya, nadawat unta siya  sa usa ka technical school, apan wala siya nipadayon didto sanglit  layo kaayo kini sa ilahang pinuy-anan busa magkinahanglan siya og igong kantidad sa pamasahe pa lang niya.

Niining tungora, bugtong ang sari-sari store na lang nila ang ilang gisaligan. Busa, kay nihit pa man ang public school kaniadto, didto siya nipadayon sa University of the  Visayas-Minglanilla, diin tulo ka kilometros ang iyang lakawon matag adlaw. Duha lang siya ka tuig didto ug nibalhin sa usa ka catholic school human naka-graduate ang iyang mga maguwang didto.

Naputos na sila sa daghang mga utang niining higayona. Pakopyahon gihapon niya iyang classmates aron malibre siya og snack. Pagtapos niya og high school, wala usa siya nipadayon pagtungha gumikan kay wala na gyuy ikagasto iyang mga ginikanan kaniya. Dinhi siya nakahukom nga manimpad isip working student sa University of San Jose Recoletos, diin gibuligan siya sa kahigayonan. Libre na siya sa matrikula ug aduna siyang monthly allowance nga P50.

Busa nakatungha siya sa second semester nasa kursong computer science. Apan wala siya nakauyon sa maong kurso busa, nibalhin siya og kursong  Electronics and Communication Engineering.  Nadistino siya sa Commerce Department diin gikinahanglan siya nga motrabaho og unom ka oras matag adlaw.

“Being the youngest, ikaw padutyhon sa alas 7 sa buntag. Gikan sa Minglanilla, mogikan kog alas 5 sa buntag,”hinumdom pa niya.

Kasagaran niyang trabaho matag buntag mao ang paglampaso, paghakot og tubig gikan sa laing building ug may mga paper works sab. Daghan matod pa makakita niya nga magsag-ob og tubig sulod sa tunghaan apan wala niya giisip nga problema. “Positive thinker man ko. It’s a matter on how you understand the situation. Natawo man ko nga anak og pobre so I have to do this in order to succeed,”pamunto niya.

“Ang struggle didto kay maglisod ko’g tuon ug buhat sa projects kay apiki ang oras,” butyag pa niya, diin naningkamot gyud siya nga dili mu-us-os ang iyang grado  aron dili siya matangtang isip working student.

Dugang pa niini, pamilite ra gyud sa matag adlaw ang mahatag sa iyang mga ginikanan kaniya. Maayo nalang nga usahay makalibre siya og paniudto sa gitrabahoan nga opisina.

“There was a time nga wala koy pamilite, giingnan nalang ko sa akong papa nga moundang nalang pero wa ko nisugot,”niya pa.

Giutong lang gyud sa iyang mga ginikanan ang kalisod ug human sa lima ka tuig sa kolehiyo, nigradwar gyud siya niadtong 1993.

Aron maka-review sa pagkakuhaon nga licensure exam, nagtrabaho siya sa usa ka kompaniya isip   encoder matag alas 10 sa gabii hangtod alas sais sa buntag. Gikan sa duty  mopahuway siya kadiyot ug mangandam na sab sa iyang review matag alas singko sa hapon hangtod alas noybe sa gabii.

Walay oras sa pagtuon si Jesus sanglit aduna man siya’y trabaho. Gipaambit niini nga gawas sa pagtuon, pag-ampo ug pag-apil sa nobena ang iyang gibuhat sa wala pa ang exam. Matag Miyerkules mutambong siya sa nobena sa Our Lady of Perpetual Help ug matag Biyernes atua siya sa Basilica del Sto.Niño. Giampo niya nga unta ang iyang mga gitun-an  maoy mugawas sa exam. Tuod man, gidungog sa Ginoo ang iyang pag-ampo  ug nakapasar gayud siya.

Busa, niundang siya sa trabaho ug hingpit nga gidawat ang tanyag sa USJ-R isip magtutudlo niadtong 1994. Samtang nagmaestro, nikuha sab siya og masteral degree sulod sa duha ka tuig. Human niini, nikuha siya og abogasiya. Dihang abogado na siya, nagminyo  siya ug ang iyang hinigugma kanidto nga si Portia, kinsa iyang naila-ila pinaagi  sa iyang player sa basketball sanglit coach man usab siya sa maong unibersidad.

Taliwala nianing tanan nga iyang mga responsibilidad, nisulod siya sa kalibutan sa politika ug napili nga barangay councilor niadtong  tuig 2002. Ug lagi kay aktibo man sab siya isip basketball coach sa ilang lungsod, nailhan si Jesus sa kadaghanan. Duna pu’y higayon nga napildi siya og usa ka eleksiyon,  apan sa pagkasunod dagan niya, nidaog napud siya. Nagsagunson ang iyang kadaogan  sa Minglanilla sa tulo ka mga piniliay , ug naa na siya karon sa katapusan niya nga termino.

Gibutyag niini nga aduna’y panahon nga pukawon siya sa tungang gabii kay adunay mangayo og hinabang.

“Bisan last money nalang nimo but you still help kay in return without knowing naay maabot dayon nga kliyente,”asoy niini.

Laing dakong grasya nga iyang nadawat niadtong 2008 mao ang iyang promotion isip  Director sa Student Affairs Office sa unibersidad.

“Ako I’m thankful to USJ-R man, kay na-professional ko tungod nila, it’s high time to pay back to USJ-R,”sigon pa niini.

Hataas ug batuon ang dalan nga gisubay ni Jesus una pa siya nahiabot  sa iyang nahimutangan karon. Ug niining tanan,pabilin siyang mapaubsanon  ug mapasalamaton.

“There’s a sense of fulfillment nga makatabang ka’s mga tawo. For me, position doesn’t matter, kung unsa ka sa community that matters,” pahimug-at niya. Ug bugtong ang Ginoo maoy iyang gipasidunggan sa tanang grasya nga iyang natagamtam.

“Without God, I will not be successful. I work hard, I have determination to succeed and I have devotion to the Lord,”niya pa.

“No matter unsa kalisod ang kinabuhi, if you trust God, everything will follow. You do the good things the right way. You do with a pure heart.”