Ika-500 tuig pagkadiskubre sa Pilipinas pangandaman

CEBU, Philippines —  Nagsugod na sa pagpangandam ang kagamhanan sa Siyudad sa Sugbo sa ika-500 nga katuigan aron saulogon ang pagkadiskubre ni Ferdinand Magellan sa Pilipinas ug gidala dinhi ang Kristiyanismo.
Si Magellan nga usa ka tigsuhid (explorer) usa ka Portuguese apan didto nagserbisyo sa gingharian sa Espanya miabot dinhi sa  Pilipinas niadtong Marso 16, 1521.

Nagplano si Cebu City Mayor Tomas Osmeña nga ibalhin ang petsa sa Sinulog Grand Parade gikan sa Enero 2021 ngadto na sa Marso 2021 pahaom sa selebrasyon sa 500th anniversary sa pag-abot sa Kristiyanismo sa Pilipinas.

“It is expected that the King of Spain is coming and possibly the Pope is coming. We have to focus 90 percent of our preparations on that date instead of the normal Sinulog. We will still have the procession. We will not strip that,” matud ni Osmeña.

Ang mayor miingon nga ang tibuok Cebu City i-mobilize sa pagpangandam sa maong dakong selebrasyon.

Sa mao usab nga panahon gusto sa mayor nga maila ang “Cebuano Sanina” nga kasakbang sa Barong Tagalog sa mga Tagalog.

Matud sa mayor aduna unya’y himuong contest alang sa design ug details sa official seal sa ika- 500 years founding anniversary sanglit kabahin man kini sa literatura sa siyudad.

Si Osmeña midugang nga organisahon ang siyudad alang sa homestay program diin ang mga bisita mahimong makaabang og kwarto sa mga nagkalain-laing balay sa dakbayan.

Duna unya’y booking service ug ang siyudad mopagawas og guidelines alang sa estriktong sanitation sa homestay program.

Bisan og usa kini ka national event, ang mayor miingon nga dili siya magsalig sa national government aron pag-mobilize sa resources tungod kay siya man ang naa sa ground.

 “I’m using the occasion as rallying point to bring our city to another level so that when people will come in, they will said ‘this is Cebu,” ni Osmeña pa.

Mangita usab og pundo si Osmeña aron pag-ayo sa sidewalks ug paghan-ay sa street vendors.

Sigon sab ni Mayor Osmeña aduna unya’y laing special program sa siyudad aron tangtangon ug pintalan pag-usab ang mga graffiti sa kolor sa Sinulog.

Moestablisar usab og nursery sa South Road Properties o kaha sa bukirang barangay alang sa pagpatubo sa buwak sa celosia nga mao ang Sinulog official flower tungod kay ang kolor niini mao man ang kolor nga makita sa kapa ni Senior Sto. Niño. (IBM)(BANATNEWS)