NBI mosusi sa Lim ambush

CEBU, Philippines — Andam ang National Bureau of Investigation -7 mohimo og imbestigasyon kalabot sa pagpamanhig sa usa sa mga banay sa pamilya sa negosyanteng si Peter Lim niadtong Biyernes sa gabii.

Ang tigpamaba sa pamilyang Lim nagkanayon nga modangop sila sa NBI hinungdan nga si NBI-7 director Patricio Bernales Jr. miingon nga mas maayong modangop kanila ang pamilyang Lim. Matud niya aduna na silay inisyal nga impormasyon nga nakuha kalabot sa maong insidente apan wala siya modetalye bahin niini.

Si Gob. Hilario Davide III niawhag sa kapolisan nga paspasan ang pagsulbad niining sagunson nga mga pagpatay dinhi sa Sugbo.

Si Davide mituo kang Police Regional Office (PRO7) Police Chief Supt. Robert Quenery nga walay pattern ang mga nahitabong pagpatay sa mga biktima apan makaalarma gihapon kay daghan na ang napatay.

“Ang frequency lang ba, that’s my concern. Unya daring na ang perpetrators, bisan day time,” matud ni Davide.

Nabalaka sab siya kay mga kanhi ug kasamtangang opisyal sa gobiyerno sama sa konsehal sa San Fernando nga si Alexander Alicaway ug kanhi konsehal sa dakbayan sa Talisay Emil Go ang nangabiktima.

Si Davide miingon nga angay hingusgan usab ang police visibility ug checkpoints sa kadalanan.

Sa iyang bahin, masaligon si Cebu City Mayor Tomas Osmeña nga walay kalambigitan ang  Cebu City Police Office (CCPO) sa pagbanhig sa igsuon ni Peter Lim nga si Wellington niadtong miaging semana.

Kon pananglitan dunay polis nga nalambigit sa maong hitabo nakasigurado ang mayor nga dili kini sakop sa kapulisan sa siyudad.

“It’s not the Cebu City Police that’s for sure, I’m very confident on that. If its police or law enforcement it’s not Cebu City Police Department. I’m pretty sure I feel confident it’s not the Cebu City Police Office, it’s not Doria,” matud ni Osmeña.

Si Osmeña mipahibalo nga motabang ang siyudad sa pamilya sa security guard nga si William Bucay nga namatay atol sa pagbanhig kang Wellington.

Si Bucay na-assign sa parking lot sa bar nga gipanag-iya ni Wellington ug nag-man sa trapiko pagpaatras sa sakyanan niini dihang kalit kining girakrakan sa mga armadong lalaki nga nagsakay og puti nga pickup, wala ra maunsa si Wellington tungod kay bullet proof ang sakyanan niini  ug nakatago kini usa ka condominium sa IT Park.

Sa laing bahin, ang grupo sa mga layko sa Sugbo nga Commission on the Laity pinangulohan ni Fe Barino makigtagbo ni Archbishop Jose Palma aron tukion kung unsay angayan nga buhaton sa Simbahan ug sa mga layko tungod niining sagunson nga mga pagpatay dinhi sa Sugbo.

Matud pa nga gisayon-sayon na lang pagkutlo ang kinabuhi sa tawo ug wala na hatagi og bili ang kasagrado niini.

Samtang si Auxiliary Bishop Dennis Villarojo, team moderator sa Capitol Parish niingon nga bisan kinsa pa ang nabiktima kinahanglan mahatagan sila og hustisya ug mag-ampo nga dili kini mosangpot sa binaslanay kay mapagan ang kalinaw. - Decemay Padilla ug Rowena D. Capistrano (BANAT NEWS)