Sukdanan sa kalampusan

CEBU, Philippines — Dili matod pa masukod ang tinud-anay nga kalampusan diha sa materyal nga mga butang kundili, diha nimo kini matagamtam sa imong pagpaambit sa imong mga grasya ngadto sa uban.

Ang susamang prinsipyo maoy nagtuboy sa kalamposan karon sa usa ka Sales & Marketing Manager sa JIPROP Development Company nga Dionalaine S. Larase-Bonghanoy, 34 anyos, ug kinsa nagpuyo sa Suba-basbas, Lapu-Lapu City.

Lumad nga taga Claver, Surigao del Norte si Diona ug kamagwangan sa duha ka managsuoon. Kuwatro anyos pa lang siya dihang  mitaliwan na ang iyang amahan, busa, ilang inahan maoy bugtong nag-amuma kanila. Assistant sa guidance counselor sa usa ka tunghaan ang iyang inahan ug gamay ra gyud og sweldo.

“May na lang sa probinsiya naa ra sa nataran ang gulay ug makakaon gyud me but financially wala gyud,” butyag niya ngadto sa Banat News Tingusbawan.

Niadtong Grade 2 na siya, nibalhin sila dinhi sa Sugbo, apan usa ra sila ka tuig dinhi, ug nibalik ra sab sa Surigao.

Nipadayon siya sa Daywan Elementary School diin moagi sila’g basakan padulong sa  tunghaan. Aduna matod pay higayon nga natagak siya sa basakan tungod sa kapig-ot sa dalan nga ginama ra sab sa lapok gikan sa lunangan.

“Kung matagak ka kay mapilitan ka’g alimatok,” paghinumdom niya. Dugang sab niya,  “Net bag ra akong bag sa una unya taga-recess kay mogawas me aron manguha og bayabas.”

Human sa usa ka tuig kay nibalik na sab sila dinhi sa Sugbo ug dinhi na nipadayon sa Grade 4 sa Agus Elementary School. Ni-istar sila sa balay  sa iyang iyaan sa Agus, Lapu-Lapu City ug iyang inahan gitabangan sa iyang iyaan nga makatrabaho sa city hall. Apan dili igo ang kinitaan sa iyang inahan sa pagbuhi ngadto kanila.

“Diha nako ka feel nga I need to work hard, kay kung di ko maningkamot wala koy kaugmaon," niya pa.

Naningkamot gyud si Diona nga makakuha og dagkong grado aron makakuha siya og scholarship sa high school. Ug tuod man consistent 1st honor siya sukad Grade 4 ug nigradwar nga valedictorian ug  nipadayon sa high school sa St. Alphonsus Catholic School.

Kay usa man kini ka private school, nisuway si Diona pag-apply og scholarship sa maong tunghaan apan gikinahanglan pa siyang motungha og usa ka tuig didto una madawat.

“Gipaningkamotan ni nanay nga makahuman gyud ko sa first year. Nangayo sab siya og tabang kay unsa ra gud iyang trabaho sa city hall,”sigon pa niya.

Hangtod nahimo na gyud siyang working scholar sa 2nd year diin libre na siya sa matrikula ug magdawat pa og allowance.

“Lisod siya in a sense nga you have to balance study and work kay naa me apson nga grado,” paambit pa niya.

Alas otso na  sa gabii siya mahiuli kay gawas nga mo-duty pa siya isip working student, aduna sab siya'y giapilan nga club ug charismatic organization. Aktibo siya sa pag-apil og declamation ug oration contests sa high school pa. Ug ang dili niya makalimtan nga kasinatian sa pag-apil og mga contest mao ang pag-present niya nga gisi iyang ilokan sa uniform ug pagka-late niya sa contest kay ni-duty pa man siya.

“Gipaningot intawon ko’g dagan gikan sa lab padung sa venue. Dili pa ka prepared sa imong speech kay naghangos paka,”niya pa.

“Pag-present nako kay nahibong ko nga sige’g tan-aw ang judges sa akong ilok. Pagkahuman niadto ko’g CR ug didto ko kabantay nga buslot diay akong ilokan,” asoy pa niini kinsa gideklarang kampyon sa maong contest.

Moapil sab siya og quiz bee ug ang iyang daog maoy ipalit niya og projects ug pagkaon. Presidente sab si Diona sa organisasyon sa mga working students nga siya mismo ang nagtukod.

Nigradwar gyud siya sa high school nga with honors ug nakadawat og laing lima ka mga awards.

Nagtungha si Diona sa University of San Carlos-Talamban Campus sa kursong BS Psychology. Kini pinaagi sa usa ka scholarship gikan sa tag-iya sa usa ka furniture company sa Talamban. Libre na siya sa matrikula ug hatagan pa siya og  kwarta pampalit og libro, pamlite ug pagkaon.

“In return, I need to help him in his office sa paghan-ay sa mga dokumento ug pagpanarapo sa mga furniture,”suma pa niini.

Nipili siya sa kursong Psychology kay mao kini ang sugyot sa iyang ig-agaw nga abugado na karon kinsa nagsilbi niyang mentor sukad bata pa. Ug kay gradwado man sa susamang kurso ang iyang ig-agaw, siya na ang nibanos sa uniforms ug mga libro niini.

Pagtungtung niya og 2nd year, nag-sideline siya og trabaho sa usa ka fast food chain. Ang iyang sweldo maoy ibayad niya sa matrikula sa iyang manghod nga nagtungha sab sa kolehiyo.

Apan sa 3rd year na siya kay naundang iyang scholarship gikan sa maong furniture company sanglit nalugi man kini. Busa nanghangyo iyang inahan ngadto sa pag-umangkon niini nga gastohan si Diona sa kolehiyo.

Nisugot kini ug mao ang nagbayad sa matrikula ni Diona hangtod nga nigradwar. Ug aron aduna siya’y allowance, nipadayon siya og trabaho sa fast food chain.

Bisan sa maong kalisdanan, nigradwar gyud siya sa kolehiyo ug dayon nagtrabaho isip HR Assistant sa usa ka mall. Human niini, nasulod siya og nagkadaiyang trabaho nga kasagran may labot sa real estate development, diin nakapundar siya og kaugalingong balay. Hangtud nga sa nakalabay nga tuig, natudlo nga sales & marketing officer sa iya kompaniya nga nahimutangan karon.

Naminyo si Diona niadtong  2012 ngadto sa walo na ka tuig niyang uyab nga si Lie Bonghanoy kinsa abogado na karon.

Pangandoy ni Diona nga mabuntis na siya karong tuiga, magtukod og negosyo ug  kaugalingon nga charity. Pagkakaron, aduna siya’y gisuportaan nga duha ka mga charities sa mga bata.

“I feel them, because I know how it feels to have nothing. I feel compassionate in helping people,”sigon pa niini kinsa miangkon nga matag birthday niya kay didto niya saulogon sa charitable institution kauban ang mga bata.

“Dili kwarta ang sekreto sa happiness. Makita nimo ang happiness if you start sharing your blessings to others,”pamunto pa niya.

“It’s not the wealth, it’s not how thick your wallet is, it’s not how new your car is and it’s not how big your house is, but it’s how you make impact to people’s lives,” dugang pa niya.

Gibutyag sab ni Diona nga dili mahimong posible kining tanan karon nga iyang natagamtam kon wala pa’y giya gikan sa Kahitas-an.

“He is there with me, working with me form zero until now. I feel His presence everyday,”niya pa.

Busa mensahe niya ngadto sa uban nga: “Poverty is not a hindrance to success but laziness is.”

“Dream big dreams. Be persistent with your goals. Kung feel nimo dili nimo maabot imong dreams, don’t change your dreams, instead change your ways in reaching your dreams. Lastly, always have faith in God.”