P140 milyones pirated DVDs gisakmit
CEBU, Philippines — Dili mominos sa P140 milyones nga balor sa mga pirated Digital Video Disk o DVD’s ang nasakmit sa mga operatiba sa Optical Media Board (OMB) kauban ang kapulisan sa Cebu City Police Office (CCPO) atol sa gipahigayong raid sa usa ka establisamento sa dalan Colon, Cebu City kagahapon sa udto.
Si Atty. Cyrus Paul Velenzuela, chief legal sa OMB miingon nga mosuma total sa 1, 000 ka sako sa mga pirated DVD’s ang ilang nasakmit og lahi pa ang mga DVD writers ug DVD burning tower.
Matud pa nga nahurot-hurot nila sa pagronda ang 14 ka mga tindahan sa mga pirated DVD’s sa maong establisamento.
Kahinumduman nga niadtong miaging bulan, aduna’y gipahigayon nga raid ang OMB sa mao gihapong establisamento ug nasakmit ang dili muminos P60 milyones nga mga pirated DVD’s.
“Last time we couldn’t complete it dahil nagkaroon ng gulo and this time we come a lot more prepared. Humingi tayo ng augmentation sa PNP sa pag-secure ng area,” si Velenzuela miingon.
Mokabat sa 100 ka police personnel ang gipakatap sa CCPO sa lugar para sa pagtabang sa mga operatiba sa OMB hinungdan nga hapsay ang maong raid. Si Velenzuela miingon nga usa sa pinakadako nga baligyaanan sa mga pirata nga DVD’s ug CD’s ang maong building.
Dugang pa niya nga makasuporta na kini sa tibuok Cebu sa kadako sa ilang operasyon paghimo og mga pirated DVDs ug CDs.
Si Velenzuela miingon nga duna silay nadakpang gituohang tag-iya sa usa sa mga tindahan apan wa pa nila ibutyag ang pangalan. (IBM) (BANAT NEWS)
- Latest