‘Cebu is Go’ gilusad
CEBU, Philippines — Gilusad sa Sugbo kagahapong adlawa ang Cebu is Go, usa ka movement alang sa pag-awhag kang Special Assistant to the President Christopher “Bong” Go nga modagan sa pagka-senador.
Ang kalihukan gipangulohan ni Presidential Assistant for the Visayas Michael Lloyd Dino nga nagsugod sa usa ka motorcade ug giubanan sa sobra 100 ka nag-motor gikan sa Plaza Independencia padulong sa usa ka restaurant sa may dalan Juana Osmeña.
Matud ni Dino nga si Go usa ka Bisaya ug angay nga suportahan usab sa Bisaya.
Apan matud ni Dino nga siya mismo wala pa nasayud kung buot ba gyud ni Go nga modagan isip senador.
"Sa tinuod lang mura og 50-50. Ako mismo di ko sure kung modagan ba gyud siya mao na nga atua siyang giawhag nga modagan isip senador," matud ni Dino.
Daghang incumbent ug kani mayor sa Sugbo ang nitambong nga naglakip nilang Deputy Speaker Gwendolyn Garcia, Cebu City Vice Mayor Edgar Labella ug uban pa.
"He is a viable senatorial candidate. Dili siya ambisyuso ug daku sad ang pagsalig ni Presidente Duterte niya," matud ni Garcia.
Suportado sab ni Cebu City Mayor Tomas Osmeña si Go kung modagan kini sa pagka-senador sa 2019 elections.
Samtang si kanhi senador ug karon Deputy Speaker Pia Cayetano wala’y tinguha nga modagan pagbalik sa pagka-senador bisan gi-indurso siya ni Davao City Mayor Sarah Duterte-Carpio, anak ni Presidente Rodrigo Duterte.
Matud ni Cayetano kinsa nibisita kagahapon sa University of San Carlos alang sa kalihukan sa kababayen-an nga daghan pa kaayo siya og mga buhatonon hinungdan nga dili pa niya priority ang paghisgut sa politika. (GMR) (BANAT NEWS)
- Latest