Polis, barangay workers positibo sa drugas
CEBU, Philippines — Usa ka aktibong polis sa Compostela Police Station ang nagpositibo sa surprise drug test nga gipahigayon niadtong Miyerkules samtang unom ka mga kawani sa barangay Guadalupe, Cebu City nagpositibo usab.
Butyag ni Cebu Provincial Police Office Director Edgar Alan Okubo nga inisyal nga nagpositibo kini sa paggamit og ilegal nga drugas.
Girelibohan na ang maong polis kansang pangalan gipugngan una sa pagpagawas ug gibalhin sa Provincial Personnel Holding and Accounting Unit samtang nagpaabot sa resulta sa confirmatory test.
Ang nagpositibong polis may ranggo nga Police Officer 1 ug pinakauna karong tuiga.
Si Okubo mipadala og memo sa tanang hepe sa kapolisan sa kalungsoran apil ang hepe sa Compostela nga monitoron ilang mga sakop nga di magbinuang.
Giparelibohan ni Police Regional Office- 7 Director Chief Supt. Robery Quenery ang tanang polis lakip na ang hepe sa Pari-an Police Station sa Dakbayan sa Sugbo human na-entrap si PO3 Ritche Saquilabon nga nangilkil sa pamilya sa ilang dinakpan sa drugas.
Kauban ni Saquilabon ang laing kaubang duha ka polis ug usa ka barangay tanod sa barangay Pari-an nga nakasibat uban sa ilang dinakpan nga si Richie Labus.
Sa laing bahin, unom ka mga kawani sa Barangay Guadalupe ang nagpositibo sa gihimong surprise drug test sa Cebu City Office for Substance Abuse Prevention (COSAP) sa miaging adlaw. Matud sa pangulo sa COSAP Garry Lao ang nagpositibo sa drugas volunteer, loader, driver, tanod ug personnel staff apan ipaubos pa sila sa confirmatory test. (IBM) (BANAT NEWS)
- Latest
