4- buwang masuso gilugos

CEBU, Philippines — Usa ka 32 anyos   ang nag-atubang karon og kaso human giingong gilugos niini ang upat ka bulan nga  masuso.

Si Prosecutor III Naruzen Delfin-Lorete nakakita kini og probable cause sa suspetsado nga taga Barangay Labangon sa dakbayan sa Sugbo. Ang Banat News wala usa mobutyag sa pangalan sa suspek ug biktima tungod sa klase sa kaso.

Sa sworn statement sa inahan sa bata nga nagpuyo sa usa sa mga barangay dinhi sa Cebu City kini namasangil sa suspetsado nga giingong nanguyab kaniya nga gilugos niini ang upat pa ka buwan niyang anak nga babaye niadtong Marso 7, 2018.

Ang insidente nahitabo pasado alas-9 sa buntag sulod sa ilang panimalay. Matud sa 32 anyos nga inahan sa wala mahitabo ang pagpanglugos siya ug ang suspek nangape pa mga alas 6 sa buntag.

Paglabay og pipila ka minutos nigawas siya aron mopalit og diaper para sa iyang anak ug sa iyang pagbalik iyang gipatutoy ang anak ug gipakatulog.

Mibalik siya og gawas aron palitan og diaper ang anak sa silingan nga siya usab ang nagbantay apan sa iyang pagbalik sa balay, nadunggan niya iyang anak nga naghilak apan nga murag gitabonan ang baba niini maong dali-dali siyang misulod.

Iyang gipangutana ang suspek kon nganong naghilak ang bata apan ang tubag niini gigutom ang iyang anak.  Ang inahan sa bata nakabantay nga wala na matarong og sul-ob ang diaper sa iyang anak.

Gipangutana niya balik ang suspek bahin sa diaper apan nitubag kini nga daan na kining wala matarong pagsul-ob. Tungod niini tarungon unta kini sa inahan apan nakamatikod kining nagkadugo ang sampot sa anak.

 Dihadiha dayon ni-report ang inahan sa barangay ug giaresto ang suspetsado. Atol sa inquest proceedings ang akusado mas nipili nga atubangon ang kaso sa korte.  Si Lorente nirekomendar nga walay piyansa sa kaso batok sa suspetsado. (/IBM) (BANAT NEWS)