Ex-Talisay City konsehal gipatay

CEBU, Philippines — Ang kanhi konsehal sa dakbayan sa Talisay nga si Emil Go gipusil ug gipatay sa wala pa hiilhing tawo sulod sa iyang manokan didto sa Mansueto Village, Barangay Bulacao sa mao nga siyudad.

Sa imbestigasyon sa kapolisan nahibaw-an nga may samad-pinusilan sa ulo ang biktima, human kini pusila sa mga tawo nga nagsakay og four-wheel vehicle, ug dayong sibat.

Ang kangitngit sa maong dapit mga alas 7 kagabii, nakatabang sa mga kriminal nga dili sila makit-an nga mipaduol sa nahimutangan ni Go nga atol sa maong higayon naghagwa sa iyang mga apo.

Mahinumdoman nga kaniadtong 2013, si Go usab nasamdan usab sa iyang liog diha nga gipusil siya sa retiradong polis sa usa ka tigbakayan sa Barangay Bulacao, Talisay. Sa mao nga higayon, usa ka retired police nga nadestino sa Police Regional Office-7 maoy gitumbok nga suspek sa pagpamusil.

Human patya si Go kagabii, ang kapolisan naglisud paghimo sa ilang gimbuhaton kay mibunok ang kusog kaayong uwan didto sa dapit nga nahitaboan. Ang mga polis sa Talisay padayon pa nga naghimo og imbestigasyon kabahin sa maong hitabo.  (BANAT NEWS)