UCT ipatuman na sa Sugbo

CEBU, Philippines — Nagpahigayon og orientation ang Department of Social Welfare and Development kabahin sa Unconditional Cash Transfer (UCT) Program sa mga field validators sa tibuok Probinsiya sa Sugbo.

Adunay 154 ka validators ang gipaubos og orientation kagahapon samtang ang laing batch unya pa sa Huwebes.

Ang DSWD maoy gitahasan sa pagpatuman sa UCT Program diin maghatag og P2,400 nga ayuda sa mga kabus nga Pilipino nga apektado sa TRAIN Law.

Alang sa tuig 2019 ug 2020, tag P3,000 ang kantidad nga ihatag nga ayuda ngadto sa mga kabus matag tuig.

Matud sa regional field coordinator sa LISTAHAN sa DSWD-7, Ruben Boybanting, nga ang maong programa tabang kini sa mga kabus nga naapektuhan sa TRAIN Law.

Matud sa information officer sa LISTAHAN, Jessa Cereño, nga ang programa ipatuman sulod sa tulo ka tuig sugod karong tuiga hangtud sa tuig 2020.

“Posible nga madawat kining maong ayuda karon umaabot bulan sa Hulyo ug Agosto,” matud ni Cereño

Ang tanan benepisyaryo sa Pantawid Pamilyang Pilipino Program (4Ps), senior citizens nga nagdawatan og social pension ug ang tanang kabus ang makapahimulos sa maong ayuda sa UCT.

Nagkanayon si Boybanting nga adunay 174, 602 ka households sa Probinsiya sa Sugbo ang i-validate sa mga enumerators.

Matud ni Boybanting nga gitinguha sa DSWD nga maayo ang pagpatuman niining maong programaha hinungdan nga i-validate pag-usab ang anaa sa listahan nga kwalipikadong maka-avail niini. (GMR) (BANAT NEWS)