Davide pabor sa oil extraction sa Alegria
CEBU, Philippines — Si Gobernador Hilario Davide III dako ang suporta sa operasyon sa pagkuha sa lana diha sa lungsod sa Alegria bisan pa sa mga pagsupak sa mga environmentalist sa maong nadiskubrehang petrolyo.
Si Davide nagkanayon nga wala pa siya nasayod nga kon aduna nay pormal nga protesta nga gipasaka ang mga environmentalist, apan andam siya maminaw kon unsay yangungo nila.
Gisupak nila ang oil extraction kay nabalaka silang posible kining makaapektar sa kinaiyahan ilabi na sa kadagatan sa Tañon Strait nga usa ka protected area.
Sa pagkakaron ang gobernador nagkanayon nga iyang suportahan ang maong proyekto sanglit dugay na man usab kini nga gitun-an.
“Yes (support ko ana) because dugay na man na. If I remember correctly I even endorsed it,” matud ni Davide.
Si Davide nagkanayon nga kaniadto pa napasabot na sila kalabot sa potensiyal nga lana sa barangay Montpeller sa maong lungsod.
Ang China International Mining Petroleum Company Limited nga nagbase sa Macau maoy nihimo sa oil exploration sa maong lugar sukad atong tuig 2009.
Ang lokal nga kagamhanan sa lungsod sa Alegria aduna nay pagtugot sa maong proyekto sanglit ang Department of Energy (DOE) ug CIMP nagkanayon nga “commercially viable” ang maong lana sa lugar nga gilantawan nga mapahimuslan hangtod sa tuig 2037. (BANAT NEWS)
- Latest
