BJMP official gipusil

CEBU, Philippines — Gisuwayan sa pagpatay ang 54-anyos nga opisyal sa Bureau of Jail Management and Penology human kini gipusil samtang nag-urong sa traffic ang iyang sakyanan diha sa may Duterte Street, Banawa, Barangay Guadalupe Dakbayan sa Sugbo kagahapon sa buntag.

Nagpabilin pa sa tambalanan si Jail Inspector Edwin Sarcon kinsa natapsingan sa ulo. Samtang naangol usab ang usa ka Francisco Almoradas human napagan sa bala dihang girakrakan si Sarcon sa riding-in-tandem.

Matud pa ni Senior Police Officer 1 Winston Ybañez sa Homicide Section sa Cebu City Police Office BJMP Regional Office duol sa nahitaboan si Sarcon dihang gipaulanan og bala. Giingong nakabantay si Sarcon nga gipusil kini ug daling nakahupo ug nisuway pagbawos apan nikagar iyang armas maong nigawas kini sa iyang sakyanan ug nidagan padulong sa ilang buhatan.

Adunay nakuhang mga basiyo sa bala sa kalibre .45 ug 9mm  sa crime scene. Sa pagkakaron personal grudge maoy gitutukan nga motibo sa hitabo.

Ang rehiyonal nga direktor sa BJMP 7 Jail Chief Supt. Arnold Buenacosa, nga nahinabi sa Banat News nagkanayon nga si Sarcon maoy kanhi Deputy Jail Warden sa Talisay City Jail ug pangulo kini sa Custodial and Escort sulod sa kapin duha na ka tuig.

Tulo pa lang ka semana kini nabalhin diha sa BJMP Regional Office human sa lahugay sa Talisay City Jail.

Dako iyang pagtuo nga may kalabutan sa trabaho ang pagpusil kang Sarcon.

Si Buenacosa niawhag sa iyang mga sakop nga di mokompiyansa apan dili angay mahadlok pagbuhat sa ilang trabaho.

Si Cebu City Police Office City Director Senior Supt. Joel Doria mimando nga subayon ang koneksyon sa trabaho ni Sarcon dihang nadestino pa kini sa TCJ.

Sa laing bahin, si Konsehal Dave Tumulak, Chairman sa Committee on Public Order and Safety miawhag sa CCPO nga dugangan pa ang police visibility sa kadalanan ilabi na sa mga dapit nga traffic prone area.

Kini tungod sa mga nahitabong pagpamanhig sa kadalanan sama sa nahitabo kang kanhi Ronda Vice Mayor Atty. Jonnah John Ungab sa North Reclamation Area ug sa nahitabo kang Sarcon kagahapon.

Nagkanayon si Tumulak nga diha kasagaran himoon ang pagpamanhig kay naghunong ang mga biktima. Si Cebu City Mayor Tomas Osmeña miingon nga ang PNP kinahanglan moaksyon dayon matag adunay sumbong ang mga tawo aron mabalik ang pagsalig kanila. - Rowena Capistrano ug Decemay P. Padilla (BANAT NEWS)