Naghikog sulod sa pansayan
CEBU, Philippines — Patay na nga nadiskubrehan ang 52-anyos nga lalaki nga gituohang naghikog sulod sa pansayan sa ilang panimalay sa Sitio Lupa, Catarman, Lungsod sa Cordova alas 6 pasado kagahapon sa buntag.
Si Police Officer 3 Vilma Degamo sa Cordova Police Station niila sa namatay nga si Saturnino Cañete, traysikad driver.
Matud ni Degamo nga ang igsuong babaye sa namatay nga si Judeth maoy nakadiskubre sa patay’ng lawas nga nagluhod sa sulod sa pansayan ug naghigot kini og pisi sa liog nga ang pikas tumoy didto gihigot sa ibabaw sa kisame.
Dugang ni Degamo nga sa pakisusi nga ilang gihimo maoy ilang nasayran nga ang namatay nag-antus sa kasakit sa iyang lawas.
Nagtuo ang mga sakop sa pamilya nga kini ang hinungdan sa paghikog.
Hinuon si Degamo niingon nga ilang gitambagan ang pamilya sa namatay nga ipaubos sa autopsy ang patay’ng lawas aron pagseguro kung may foul play ba o wala ang kamatayon niini. (BANAT NEWS)
- Latest