CSBT nangandam na sa Semana Santa

CEBU, Philippines — Sugod Miyerkules Santo sa hapon, gipaabot nga modagsa na ang dili momenus 40 mil ka mga pasahero diha sa Cebu South Bus Terminal alang sa Semana Santa.

Matud ni Joey Herrera manager sa CSBT nga ila nang gipangandaman ang pagdasok sa mga mosakay sa terminal ilabina kon mag-half day ang ubang mga trabahoan paghatag og oras sa mga empleyado nga makauli og sayo sa ilang tagsa-tagsa ka mga lungsod sa probinsya.

Matod ni Herrera manghulam sila og duha ka Kaoshiung bus gikan sa dakbayan sa Sugbo nga motabang og hakot sa mga pasahero kon ugaling wala nay bus sa terminal.  Gitataw hinuon ni Herrera nga ang maong mga bus alang lang sa mga priority passengers sama sa senior citizen, mabdos, adunay gamay nga bata nga dala ug mga person with disabilities (PWD).

Si Herrera nagkanayon nga matag priority passenger mamahimo usab makuyogan sa usa ka regular passenger ngadto sa priority area.

Gawas sa bus, mohulam usab og tulda ug portalettes ang CSBT ngadto sa dakbayan sa Sugbo alang sa mga pasahero nga magpaabot sa ilang turno nga mosakay sa ilang bus.  Dugang 20 ka polis ang ibutang sa terminal gikan sa Cebu Provincial Police Office (CPPO) nga motabang sa di momenus 25 ka blue guards hangtod na sa Domingo. Si Herrera nagkanayon nga niadtong miaging semana nagsugod na usab ang Land Transportation Office (LTO) ug Land Transportation Franchising and Regulatory Board (LTFRB) sa pagsusi sa mga bus kon kini “road worthy” o angayan ba nga ibiyahe.

Kini human nga mihangyo usab ang mga bus operators nga sayohon ang inspeksyon aron masuta kon unsa nga mga bus ang angay ayohon aron makabiyahe. (BANAT NEWS)