Helmet estriktuhon na sa Talisay

CEBU, Philippines — Gitug-an sa pangulo sa City of Talisay-Traffic Operation Development Authority (CT-TODA) nga ila nang gihinay-hinayan sa pagpukaw o pagsusi ang ordinansa sa pagdakop sa mga tawo nga magmotorsiklo nga dili magsul-ob og helmet.

Kini human ang dakbayan sa Talisay dili estrikto sa pagpatuman niini ug matud pa ni Almond Keith Dela Peña, pangu sa CT-TODA, nagkadaghan ang disgrasya ug sagad sa nagrabehan mao kadtong wala magsuot og helmet.

Hinuon kon ila man gani nga estriktohon ang balaudnon sa karsada hayan diha lang una nila sugdan sa national highway.

Ilaha pa usab tukion unya kauban sa mga opisyales kon buhaton ba nila ang gihimo didto sa Mandaue nga nagdili sa ski mask ug bisan unsang salimbong sa nawong sa mga magmotor.

Matud pa ni Dela Peña makaluluoy ang magmotorsiklo tungod kay mahanggab gyud ang abog ug aso kon way proteksyon.

Sa pagkakaron mas importante gyud nga mag-helmet ang mga magmotor aron kun aduna may disgrasya dako ilang purohang masalbar. (IBM) (BANAT NEWS)