Canadian nag scuba diving nalumos
CEBU, Philippines — Usa ka Canadian national ang nalumos samtang nag dive sa kadagatan sa Isla de Gato, lungsod sa Daanbantayan kagahapon sa buntag.
Si PO1 Louie Mesa, tourist police sa lungsod miila sa langyaw nga si Jimmy Gen Keung Wong, 48.
Matud ni Mesa base sa ilang pakighinabi sa dive master ni Wong nga si Wilmar Ypsor, walo ka langyaw nga divers ug tulo ka dive masters ang nibiyahe gikan sa isla sa Malapascua padulong sa Isla de Gato mga alas 9:30 sa buntag kagahapon.
Pag-abot sa lugar ni dive ang grupo sa gibana-banang 20 ka metros nga gilawomon ug paglabay og 15 minutos misenyas ang dive master og "safety stop."
Si Wong adunay partner nga diver, apan ang iyang partner lang ang nakatunga.
Sa dihang nasuta nga wala si Wong gibalik kini ni Ypsor sa ilawom ug gipangita hangtud nga kini nakit-an wala nay kinabuhi sa ilawom.
"Nakit-an niya si Jimmy nga nag hayang ilawom sa dagat, unya wala na ang katong support sa hangin nga murag mouthpiece ba. Wala siya kahibalo kung ngano," matud ni Mesa.
Gisuwayan kini pag-revive sa mga divers samtang padulong pabalik sa Daanbantayan apan pag-abot sa district hospital patay na kini. (IBM) (BANAT NEWS)
- Latest
