Inayawan access road suportado sa oposisyon

CEBU, Philippines — Bisan og managlahi og politikanhong partido, pipila ka konsehal sa habig sa oposisyon ang pabor sa plano ni Cebu City Mayor Tomas Osmeña nga ayuhon ang Inayawan Access Road aron makatabang nga maluag-luagan ang trapik sa habagatang bahin sa dakbayan.

Si Konsehal Joel Garganera niingon nga ang pag-ugmad sa access road angayan nga lihukon dayon tungod kay daghan na nga motorista ug sumasakay ang apektado sa kahuot sa trapiko sa habagatang bahin gumikan sa pag-ugmad sa underpass project sa Natalio Bacalso Avenue ug F. Llamas Street.

Matud sa konsehal nga ang maong access road gihimo na kaniadto isip alternatibong rota sa mga garbage trucks aron paspas ang garbage collection.

Kini hinimo sa culverts nga nagkonektar sa Inayawan ug Cebu South Coastal Road.

Ang Inayawan Access Road nakontrobersiyal kaniadto dihang dunay mga mananagat ang nagprotesta sa paghimo niini tungod kay giingong gibabagan ang ilang agianan padulong sa dagat.

Ang kaalyado ni Garganera nga si Konsehal Pastor Alcover Jr. niingon nga andam sila motabang sa kasamtangang administrasyon sa pagtubag sa problema sa trapiko.

Apan kini nitataw nga angayan nga ang mayor mohunong sa pagtawag kanila og obstructionist tungod kay suportado nila ang mga proyekto nga makaayo sa katawhan.

Samtang si City Engineer Josefa Ylanan niasoy nga posibleng sa sunod semana ipasusi nila ang lugar aron makaumol og rekomendasyon kun ipadayon ang pag-ugmad sa access road. GMR (BANAT NEWS)