Kabalayan naugdaw

CEBU, Philippines — Gibanabanang lapas 220 ka mga panimalay  sa Sitio Kitchen,  New Paradise ug Camansi sa Barangay Pajo sa Dakbayan sa Lapu-Lapu nga ginama sa mga gaay ang naugdaw atol sa sunog kagahapon sa hapon.

Samtang gisubay pa karon sa mga imbestigador ang report nga adunay mga batang na-missing.

Nadawat sa kabomberohan ang alarma alas 5:10 nga  giisa sa task force alpha nga gisaka ngadto sa general alarm alas 5:43 ug hingpit nga nakontrolar alas 7:04 na sa gabii.

Matud pa ni Senior Officer 2 Climaco Salisid, Fire Investigator, ang sunog nagsugod sa panimalay ni Lilia Canedo nga diin giingong mga bata nga gituohang apo sa tag-iya sa panimalay ang nagduwa og posporo kini base sa pangangkon sa mga saksi.

Sumala pa ni Salisid, gibadlong ang mga bata apan wala na kini nabantayi kon unsay sunod nilang gibuhat tungod kay pagtaud-taod niulbo na ang sunog sa kabalayan. Gibanabana ni Salisid nga P550 mil ang danyos.

Sa pagsuwat ning balita gibutyag sa imbestigador aduna pa silay susihon nga giingong bata nga missing kadtong giingon nagduwa og posporo nga kwatro anyos.

Si Kapitan Junard "Ahong" Chan sa Barangay Pajo nitug-an nga dili mominos sa 200 kapin ka mga panimalay ang apektado sa sunog.

Ang mga nasunogan ipahimutang sa sports complex ug eskuylahan ug panghatagan sila og mga pagkaon.

Gipahibaw usab ni Chan nga ang lugar nga nasunogan gipanag-iya og pribadong tawo. Wala pa matino kon tugotan bang makabalik pagtukod sa ilang mga balay ang mga biktima diha sa maong lugar.

Ang maong sunog gitubag og laing sunog diha sa Sitio Humay-humay sa barangay Gun-ob pipila lang ka minutos human nakontrolar ang sa Pajo, giingong napawong ra usab kini dayon paglabay sa kinse minutos.

Gitubag usab kini og laing sunog sa Lower Gochan sa Quiot, Cebu City nga dali ra usab napawong sa mga tawo. IBM (BANAT NEWS)