Insidente sa sunog sa Central Visayas misaka
CEBU, Philippines — Buwan sa Marso karong tuiga daghan ang mga insidente sa sunog sa Central Visayas kompara sa milabay’ng tuig sa susamang buwan base sa obserbasyon sa kabomberohan sa pagsaulog sa Fire Prevention Month.
Niadtong Marso 1 ngadto sa 31, 2017 aduna lang kini 24 ka insidente sa sunog samtang sa Marso 1 ngadto sa 13 niining tuiga aduna na kini 40 ka insidente sa sunog nga natala sa kabomberohan.
Ang klase sa sunog naglangkub sa residential-19; rubbish/grass fire-15; storage-3 ug business establishment-1
Matud sa regional director sa Bureau of Fire and Protection (BFP)-7 Senior Superintendent Samuel Tadeo nga usa sa nakapataas sa ihap sa sunog sa Central Visayas mao ang pagbalik sa Negros Oriental sa BFP-7 diin nakadugang kini og upat ka insidente sa sunog.
Ang sobrang kainit sa panahon sa niaging duha ka semana mao’y gitumbok nga usa sa hinungdan sa mga grass fire.
Lain gitumbok sa grass fire mao ang pagpataka’g labay sa upos sa sigarilyo ngadto sa mga dahon nga uga kaayo diha kilid sa dalan.
Samtang electrical wiring maoy kasagaran nga hinungdan sa sunog sa mga panimalay.
Ang BFP-7 ug JCI Metro Cebu mogama og kasabutan alang sa dungan nga pagpahigayon nila sa medical ug fire prevention training ngadto sa mga kalungsuran. (BANAT NEWS)
- Latest
