Market inspector gidunggab sa ulo

CEBU, Philippines — Namatay gyud ang market inspector sa Dakbayan sa Lapu-Lapu nga biktima sa pagpanunggab kaniadtong Martes sa gabii sa tawo nga iyang gibadlong nga dili pakatulgon sulod sa merkado.

Si SPO2 Joseph Andrin sa Presinto 3 sa Lapu-Lapu  City Police Office (LLCPO) miila sa gipatay nga si Delfin Tumulak, taga Barangay Poblacion, Lapu-Lapu City.

Matud ni SPO2 Andrin nga nag-ungot pa ang kutsilyo sa ulo ni Tumulak dihang una nga gidala ngadto sa Lapu-Lapu City Hospital, apan gibalhin sa tambalanan sa dakbayan sa Sugbo.

Ang giingong nakadunggab ni Tumulak mao si Michael Yanez, 25, taga Barangay Canjulao, Lapu-Lapu nga nadakpan ra usab dayon sa kapolisan.

Nasuko si Yanez nga gibadlong siya ni Tumulak mao nga iya kining gisunod ug dihang nalipat, gikalitan pagdunggab. Giandaman na sa kapolisan og kasong kriminal si Yanez aron ipasaka sa hukmanan. (BANAT NEWS)